Spurde om kulturskulen: Ikkje nøgd med svaret

Svein Åge Vangdal (Sp) spurde i kommunestyret om musikkleik-tilbodet for barna frå Ølve, Hatlestrand og Varaldsøy. Han var ikkje heilt nøgd med svaret han fekk.

I spørsmålsrunden viste Vangdal til at kommunestyret nyleg vedtok planen for oppvekstkår, der det står at alle barn og unge skal ha eit likt eller likeverdig tilbod i heile kommunen.

– Lenger tilbake, då kulturskulebygget på Husnes skulle realiserast, vart det presisert og lova at kulturskulen sine desentraliserte tilbod skulle vidareførast og ikkje nedprioriterast. Noko mange i dei bygdene som ikkje kan nytta seg av tilboda på Husnes, var uroleg for. I dag ser ein at tilbodet om individuell instrumentopplæring framleis vert gjeve i heile kommunen. Men eit heilt avgjerande tilbod for å rekruttera elevar til slik opplæring, er borte frå ein del av kommunen, fortalde Vangdal.

Han opplyste at barna i alderen 5-8 år frå Varaldsøy, Hatlestrand og Ølve har mista det viktige tilbodet om musikkleik og grunnkurs.

– Dette er teke opp med skulen, utan positiv respons. Spørsmålet til ordføraren blir difor om han vil ta saka opp med Kvinnherad Kulturskule, med mål om at dei nemnde tilboda er på plass for neste skuleår, og at skulen marknadsfører dette aktivt, sa Svein Åge Vangdal.

 

Ambisjon

Ordførar Hans Inge Myrvold (Sp) hadde henta inn svar frå kulturskulen, og forklarte at musikkleik vert sett i gang om det er seks påmeldte barn.

– Frå politisk hald er det ein ambisjon om å ha eit likeverdig tilbod. Eg ser det er grunnlag for ei vidare politisk handsaming, og så må vi frå politisk hald eventuelt syta for auka rammer, sa Myrvold.

Men Vangdal var ikkje heilt nøgd med svaret.

– Det minste er at tilboda må stå på lista over dei annonserte tilboda. Viss ikkje, så går det ikkje an å melda seg på. Desse ungane har rett på dette tilbodet, understreka han.