Skal tenka nytt for å oppretthalda folketalet

– Vi har behov for å tenka nytt, seier fylkesordførar Jon Askeland, som er uroa over at det samla folketalet i 35 distriktskommunar i Vestland vil gå ned dei komande 20 åra.

Fylkesutvalet viser til at det samla folketalet i 35 av dei 43 kommunane i Vestland fylke er spådd å gå ned frå 214.000 innbyggjarar i dag til mellom 207.000 og 211.000 i 2040.

Kommunal- og moderniseringsdepartementet har sett ned eit utval som skal sjå på tiltak for å motverka dette. Utvalet har lagt fram sine tankar og sendt dei ut på høyring, og det er denne utgreiinga fylkesutvalet no har svara på.

– Vi er positive til utprøving av nye tiltak i distriktspolitikken. Desse har vore relativt uendra over mange år. Samfunnet og føresetnadane for distrikta er i endring, og då bør verkemiddelapparatet tilpassast dette. For å sikra god fordeling av kompetanse og ressursar, er det viktig at fylkeskommunane blir ein sentral part i gjennomføringa av tiltaka. Vi legg vekt på å få samfunn prega av tillit, tryggleik, tilhøyrsle og tilgang til gode som arbeid, utdanning og gode nærmiljø, seier Askeland i ei pressemelding.

Gode vegar

Fylkesutvalet er positive til forslag om forsøk med fleire desentraliserte einingar i statlege verksemder for å oppnå auka statleg sysselsetting i distrikta.

– Dette tiltaket er viktig for å skapa varierte og interessante arbeidsplassar i distrikta, men vi kunne ynskja oss at utvalet var tydelegare på at statlege institusjonar i større grad må etablerast utanfor dei store byane, seier Askeland.

Eit anna punkt fylkesutvalet peikar på er behovet for god samferdsel.

– Gode vegar er avgjerande for god nærings- og arbeidsmarknadsutvikling og velfungerande distrikt og lokalsamfunn. Vi ynskjer satsing på vegprosjekt som bind regionane tettare saman, og ser gjerne at fylkeskommunen blir meir involvert i NTP-prosessane ved å finna løysingar på regionale utfordringar, seier Askeland.