– Lovar at dei kan flytta inn i god tid før jul neste år

Kvinnherad Breiband har landa på at det komande Seniorsenteret på Husnes skal bli deira nye heim. Ei avgjersle som betyr at ein truleg kan setja spaden i jorda tidleg neste år.

Etter å ha sondert Husnes-området etter eit passande nytt lokale sidan årsskiftet, landa eit einstemmig styre i Kvinnherad Breiband onsdag på Seniorsenteret i Husnes sentrum. Dei kjøper 1. etasje på bygget og ser spent fram til flytting.

– Vi har hatt ein god runde med evaluering og har sett konkret på fleire gode alternativ. Vi har både vurdert leige og eige, og landa til slutt på at 1. etasje i det komande Seniorsenteret var det beste alternativet, seier dagleg leiar Gunnhild Nilsen Hillestad i Kvinnherad Breiband og legg til:

– Det er heile totalpakken her som gjer at det passar oss så godt. Vi har fleire sære behov som vi får dekka no når vi får skreddarsy vårt eige lokale, og så ligg det veldig bra til med tanke på infrastruktur. Vi gler oss og ser spent fram til å kunna flytta inn.

 

Kan flytta inn før jul 2021

Leigeavtalen i Dimmelsvik går ut i 2021, difor passa lovnaden som hovudentreprenør Engelsen Bygg AS kunne koma med fredag som hand i hanske.

– Det at Kvinnherad Breiband har vedteke å flytta inn i Seniorsenteret har vore utløysande for vårt arbeid vidare. I går vedtok styret i Engelsen byggjestart på prosjektet, vi har sendt inn rammesøknad og er godt i gang med detaljprosjekteringa. Difor kan eg lova Gunnhild at dei kan flytta inn her i god tid før jul neste år, seier Roald Urnes.

Med det har prosjektet fått ein flygande start, som betyr at Urnes og Engelsen Bygg planlegg å setja spaden i jorda på tomta like over vegen for Posten i starten på 2021.

– Dette er ein merkedag for Seniorsenteret, og om alt går slik vi håper så kan vi kanskje få fysisk start tidleg neste år, seier Urnes.

Seniorgruppa, som dei siste to åra har arbeidd med etableringa av eit seniorsenter på Husnes, visste ingenting om Kvinnherad Breiband-nyhendet før det vart annonsert på tomta fredag føremiddag.

– Dette betyr at vi no får det i gang. Det er ein skikkeleg festdag, seier Roald Teigen før Kristian Hus skyt inn.

– Dei har klart å gjera fredag den 13. til ein skikkeleg gladdag.

 

20 av 29 seld

Over hovudet på breibandleverandørane i det komande Seniorsenteret skal det reisast 29 leilegheiter skreddarsydd eldre bebuarar. Av dei er så mange som 20 allereie selde.

– Vi har fått ein veldig god start, og må få skryta over seniorgruppa som har jobba veldig tett med oss. Dei har ein eigen evne til å masa positivt. Dei har vore ein fantastisk backing og pushing for oss, seier Urnes.

Salsansvarleg i Engelsen Bygg, Leif Helge Østebø, kunne også fortelja at dei har fått leigd seg eit lokale i Husnes Storsenter kor dei planlegg å byggja ein leilegheit tilsvarande slik dei vil sjå ut når Seniorsenteret står klart.

– På den måten kan vi visa korleis leilegheitene vil sjå ut med alt av innhald som kjøken og slikt, seier Østebø før Gunnhild skyt inn:

– Og med breiband, så klart.

– Ja, sjølvsagt med breiband, held Leif Helge fram.

Engelsen Bygg håper å ha utstillingsleilegheita så snart som mogleg.