– Det er utleigar som har ansvar for at godt smittevern vert ivareteke

Kvinnherad kommune har fått fleire spørsmål om smittevern og drift av campingplassar og båthamner.

– Etter eit møte i beredskapsgruppa, med utgangspunkt i dei nye tiltaka som vart lagt fram denne veka, ynskjer kommunen å opplysa om at det er utleigar av campingplass og båthamn som har ansvar for at godt smittevern vert ivareteke, skriv kommunen i ei pressemelding.

Dei held fram med å påpeika at utleigar kan pådra seg konsekvensar eller bøter om ikkje smittevernet blant gjestene vert følgd opp på ein tilfredsstillande måte.

– Det er i motsetnad til i fjor no oppmoda om å halda sanitæranlegga ope. Dette er for å unngå at gjester bruker alternative løysingar som ein ikkje har kontroll over. Samstundes er det opp til den enkelte utleigar å vurdera om ein skal halda ope eller stengt, skriv kommunen.

 

To personar, ikkje kohortar

Dei oppmodar vidare utleigarane til å utarbeida ei risikovurdering for eiga drift.

– Verksemdene må sjølve vurdera om dei vil ha ope og ta i mot gjester eller stenga drifta i denne perioden. Anbefalinga er no at ein skal ha maks to gjester på besøk i hus, hytte og hage. Her tolkar ein at dette òg gjeld for campingvogn og bubil. Ved at hage er spesifisert vil dette innebera at ein ikkje kan ha meir enn to gjester utanfor si eiga vogn, bubil eller båt, skriv kommunen og påpeikar at to gjester no betyr to personar og ikkje kohortar.