Sundesprell heile helga

Sundedagen har utvikla seg til ein heil festival under namnet Sundesprell. Med konsertar, familieaktivitetar og lokalhistorie var det noko for ein kvar smak på helgemenyen.

Fredag var det rusfritt ungdomsarrangement på gamleskulen på Sunde. Der sytte C.T. & General Chesz og DJ Edgar Bakke for musikken. I teltet i båthamna stod blant andre countrybandet Meirso frå indre luten på scenen ut i dei seine nattetimar.

Laurdag føremiddag var det barne- og familieaktivitetar i hamna, noko som lokka mange til å ta turen for å kjenna på festivalstemninga. Fleire vart skyssa til Sunde frå Husnes i Lars Wang sin veteranbuss. På bryggjekanten var det sett opp mange buer som selde lokal og heimelaga mat og søtsaker. Den historiske kremmarbua var open, og det vart tradisjonen tru arrangert palleløp og båtsnikring. Røde Kors, Kvinnherad Brannvern og dykkarklubben hadde stand for å visa seg fram.

Dei tøffaste kunne prøva seg på den heftigaste trenden innan vassport, nemleg flyboard. Flyboard sender deg mellom 0-20 meter opp i lufta ved hjelp av vasstrykk. På kaien vart det også stilt ut gamle båtmotorar frå 60-talet, og dei var det god gang på framleis. Om kvelden var det ny konsert i hamna, med Matti Røssland og Stephen Ackles som trekkplaster.

Søndag var det historisk vandring til Fenafjell, med avgang frå skuleplassen til Sunde barneskule og kafé i gamleskulen. På ettermiddagen fortalde Johanne Øvstebø Tvedten lokalhistorie til bygdefolket.