Gav løyve til sprenging og knusing

Matprodusenten Brødr. Hjønnevåg er skeptisk til knusing av stein på Børneset, og fekk støtte frå kommunedirektøren. Men politikarane sa samrøystes ja til både sprenging og knusing.

Forvaltningsutvalet handsama rett før jul ein søknad frå Eidsvik Eigedom AS. Kommunedirektøren innstilte på å gje løyve til tomteplanering av inntil 9.500 m3 fjellmasse. Derimot var innstillinga negativ når det gjeld knusing av stein, før det er fastsett rammer for dette forankra i den nye reguleringsplanen for Børnes.

– Eg stussar over at det ikkje blir tillate med knusing av stein. Men dei får lov til å sprenga og planera? undra Kai Morten Torget.

– Ja, dei får lov til å sprenga, stadfesta Clara Hveem (Sp).

 

Plan for massehandtering

Årsaka til atterhaldet om knusing, skuldast ein merknad frå Brødr. Hjønnevåg. Dei peika på at støy og støvplager frå liknande planeringstiltak i nærområdet har gitt dei driftsmessige utfordringar. Dei minna også om jobben deira med matproduksjon og renomméet sitt. Firmaet ynskjer difor ein plan for arbeidet, slik at ein unngår unødige konfliktar.

– Vi har konkludert at det ikkje er gjort tilstrekkeleg greie for konsekvensane, og vi saknar ein massehandteringsplan, utdjupa avdelingsleiar Natalie Sæberg.

Men Kai Morten Torget var ikkje overtydd.

– Viss det er støv som er problemet for Hjønnevåg, så bør ein kunna løysa det ved å sprenga ved gunstig vindretning og bruka mykje vatn. Brødrene Musland har knust stein der i årevis. Eg ser ikkje anna råd enn å ta vekk den setninga, analyserte han.

– Eg ser ikkje problemet. Støv blir det uansett når det blir sprengt og planert. Eg blir så frustrert. Dei har jo knust masse der før. Administrasjonen må prøva å hjelpa oss, for vi må løysa dette. Vi kan ikkje stoppa utviklinga i Kvinnherad, følgde Øyvind Hardeland (Ap) opp.

 

Stoppar opp

Guttorm Røssland (H) tykte kravet om massehandteringsplan var ein bremsekloss.

– At dei skal kunna sprenga, men ikkje knusa – då stoppar det opp for meg, sukka han.

Kai Morten Torget la fram eit forslag om å godkjenna både tomteplanering og knusing.

«Det skal i perioden med sprenging og knusing av stein takast særleg omsyn til nærliggjande

bedrifter når det gjeld støv generert av knusing og sprenging, slik at det fører til minst mogleg

ulemper for matproduksjon som skjer i nærleiken. Det skal fastsetjast rammer for dette forankra i den nye reguleringsplanen for Børnes», står det i forslaget, som vart samrøystes vedteke.