Næringsfondet har ikkje meir pengar

Kassa til kommunen sitt næringsfond er tom, og det vert ikkje utbetalt meir pengar i 2017.

Til møtet på torsdag låg det føre fire søknader om støtte til næringsfondet. For tre av dei låg det føre innstilling om å gje tilskot, medan eitt låg an til å få avslag. Politikarane ante fred og ingen fare, heilt til Leif Sverre Enes (H) spurde om kor mykje pengar som stod att for i år.

– Midlane er brukt opp, kunne rådmann Odd Ivar Øvregård opplysa.

Følgde politikarane innstillingane, så ville det verta eit overforbruk på 5.000 kroner, men det lova rådmannen å finna ei løysing på. Og slik vart det.

– Det er ein trasig situasjon at vi har brukt opp heile næringsfondet på eit halvt år. Men det er sikkert min feil mykje av det, sa Leif Sverre Enes, i vissheit om at han jamt over er den mest positive til å innfri søknadane, og gjerne auka beløpa om mogleg.

– Så då vedtek vi det som ligg på bordet i dag, og ynskjer samstundes «god jul», sukka ordførar Peder Sjo Slettebø (H).

 

Føremålet

Men Øyvind Lernes (H) såg den overraskande vendinga som ei moglegheit.

– Då har vi eit halvt år til å finna ut kva vi skal gjera med fondet. Eg har ikkje sansen for noverande måte, og synest den er lite målretta, analyserte han.

Det var ordføraren samd i. Føremålet med næringsfondet vert dermed tema for diskusjon i månadane framover.