Landsskyting på heimebane

Tørt krut og skarpt sikte var ikkje nok til å dempa lengten etter eit skikkeleg landsskyttarstemne, men Heime-LS er likevel eit plaster på såret.

 

Elias Lovius og Erika Paulona Nylund Nygaard frå Høylandsbygd var to av dei 22 skyttarane til Kvinnherad Skyttarlag som måndag kveld samla seg i Midthølen for å delta på Heime-LS.

11 år gamle Elias Lovius skulle i år delta på sitt første landsskyttarstemne, men slik skulle det jo ikkje bli. I år skulle dei vore på Elverum og testa seg mot resten av landet, men no foregår tevlinga frå heimebanen.

– Eg blei litt kasta litt inn i dette fordi søster mi driv og skyt, men eg byrja med det så tidleg som eg kunne. I år skulle me tatt campingvogna og køyrt til Elverum for å delta, fortel ungguten med tre skytesesongar bak seg.

Elias blir køyrt frå Høylandsbygd til Midthølen for å trena ein gong i veka. Søstera Erika, som snart blir 18, trener tre gonger i veka, og har vore på fire landsskyttarstemne før.

– Det er årets happening, utan tvil. Det er det me trenar til og gler oss til. Det er då det gjeld, seier ho.

 

Svoltefora

Terje Hus i Kvinnherad Skyttarlag gledde seg over aktivitetsnivået og stemninga på skytebanen i Midthølen, men er tydeleg på at det er ei fattig trøyst.

– Veldig stort sakn å ikkje frå reisa på landsskyttarstemnet. Innan skyttarmiljøet er LS det kjekkaste som er, og det er veldig spesielt for oss. Det er vanlegvis to skytingar for kvar av skyttarane, men for meg som er trenar blir det å springa frå skyting til skyting og prøva å få med seg mest mogeleg, noko eg gjer med glede, seier Hus.

På heime-LS tevlar alle som vil mot kvarandre.

– Dei tre med dei beste resultata i klasse 3-5 senior får vera med saman med ein gjeng førehandsuttatte skyttarar. Det er dessverre ingen frå Kvinnherad som er tatt ut blant dei, men totalt skal 56 skyttarar ut mot kvarandre i noko som liknar eit kongelag. Det blir vist på TV, og veit eg kjem til å sitja klistra føre skjermen og følgja med. Det har jo ikkje vore noko slik skyting i heile år, forklarer ein openbert svoltefora Terje Hus i Kvinnherad Skyttarlag.

 

Heima-LS, Kvinnherad Skyttarlag, 10. august 2020:

Meisterskap:

3-5: 1. Audun Fossberg 336, 2. Ørjan Almeland Sjo 333, 3. Arvid Tufta 332, 4. Terje Hus 323, 5. Unni Gorm-Hansen 322, 6. Dagfinn Mehl 321, Paul Are Ljosnes 315

Klasse 2: 1. Leif Skeie 329, 2. Jens Åge Fossberg 322, 3. Lars Ole Skeie 314,

V55: 1. Ole Bennæs 323,

V65: 1. Arnt Orholm 346, 2. Sigmund Hjelmeland 238,

V73: 1. Håkon Leganger 345, 2. Kåre Kroka  334,

Eldre Junior 18 år: 1. Erika Paulona Nylund Nygaard 322,

Junior 16-17 år: 1. Andreas Hansen 345, 2. Dina Gorm-Hansen Haugse 340,

Rekrutt 11-13 år: 1. Helene Hansen 343, 2. Elias Lovius Nylund Nygaard 318,

Nybyrjar ung: Simon B Flatebø 208

Kikkertklassen: 1. Øystein Flatebø 229