Stortingsrepresentantar frå Kvinnherad

Grenda har bladd i arkivet for å prøva og kartleggja kven frå Kvinnherad som har sete på Stortinget.

Om lista er komplett vågar vi ikkje seia, men dette er i alle fall dei namna med tilknyting til Kvinnherad som vi ser har møtt på Stortinget. Kjelder er Grenda sitt eige arkiv, Wikipedia og Stortinget si nettside.

PS! Etter at denne lista stod på prent i torsdagens Grenda, har vi fått innspel om fire andre personar frå Kvinnherad som også tenestegjorde på Stortinget. Desse vil bli omtala i eiga sak i neste veke.

 

* Haldor Pettersen Helland (1799-1862) frå Husnes vart valt inn på Stortinget i 1851 og 1854. Han representerte Søndre Bergenhus Amt. Helland sat i Bankkomiteen.

* Niels Juel (1831-1897), Venstre, frå Halsnøy var stortingsmann for Søndre Bergenhus amt frå 1873 til 1888. Han vart i 1888 historisk som den fyrste på Stortinget som sette fram forslag om å innføra folketrygd.

* Olav Myklebust (1868-1938), Venstre, frå Omvikdalen hadde ein lang periode som stortingsrepresentant, heilt frå 1913 til sin død i 1938. Han sat i Stortinget sin presidentskap, fyrst som varapresident i Lagtinget, så som varapresident i Stortinget, og til slutt som Odelstingspresident.

* Knut Markhus (1878-1963), Venstre, frå Halsnøy noterte seg for fire stortingsperiodar; 1922-1924, 1925-1927, 1928-1930 og 1937-1945. Han var medlem i Veg- og jernbanekomiteen, Tollkomiteen og Valkomiteen. Han var i to år parlamentarisk leiar for Venstre og Stortinget sin visepresident i åtte år. Han rakk også å vera sekretær i Odelstinget.

* Christian L. Holm (1892-1981), Høgre, frå Rosendal fekk ein lang karriere på Stortinget. Fyrst var han vararepresentant nr. 1 for Hordaland i tida 1945-1949. Deretter fekk han fire periodar som fast representant; 1950-1953, 1954-1957, 1958-1961 og 1961-1965. Han var heile tida medlem i Valkomiteen, men notere seg også for periodar i Skog- vassdrags- og industrikomiteen, Landbrukskomiteen, og varaplass i Den utvida utanriks- og konstitusjonskomité.

* Thor Myklebust (1908-1989) frå Uskedalen kan skilta med heile fem periodar på Stortinget; dei 3,5 fyrste for Venstre, deretter for Det Nye Folkepartiet. Fyrst var han vararepresentant nr. 2 for Hordaland 1954-1957, så vararepresentant nr. 3 for Hordaland 1961-1965, deretter fast representant 1965-1969, fast representant 1969-1973, og til slutt vararepresentant nr. 1 1973-1977. Han fekk med seg medlemsskap i Kommunalkomiteen, Kommunal- og miljøvernkomiteen, og Den forberedende fullmaktskomité. Ikkje minst var Myklebust varapresident på Stortinget frå 2. oktober 1972 til 30. september 1973.

* Erling Løseth (1927-2013), Ap, frå Husnes var vararepresentant nr. 2 for Hordaland i 1969-1973, vararepresentant nr. 3 for Hordaland 1973-1977, og vararepresentant nr. 1 for Hordaland 1977-1981. Han møtte fast frå 1. oktober 1977 til 30. september 1981. I denne perioden var han fyrst medlem i Administrasjonskomiteen, deretter i Kyrkje- og undervisningskomiteen.

* Aksel Kloster (1948-2006), Ap, frå Sunde var vararepresentant nr. 1 for Hordaland frå 1981 til 1985. Han hadde ein kort periode som fast representant frå 1. oktober til 14. oktober 1981. Han var då så vidt innom Valkomiteen.

* Britt Harkestad (1946-), KrF, frå Herøysundet har to periodar som fast representant på Stortinget; 1985-1989 og 1989-1993. I den fyrste var ho sekretær i Valkomiteen og medlem i Sjøfarts- og fiskerikomiteen. I den andre var ho medlem i både Valkomiteen og Kommunal- og miljøvernkomiteen, samt vara til Den utvida utanriks- og konstitusjonskomiteen.

* Gunnar Fatland (1946-), Høgre, var født i Kvinnherad, men representerte Rogaland på Stortinget. Han var fast medlem i tre periodar; 1985-1989, 1989-1993 og 1993-1997. Han sat fyrst og fremst i Energi- og industrikomiteen, men rakk også nokre månader i Forbrukar- og administrasjonskomiteen.

* Hans Inge Myrvold (1985-), Sp, frå Hatlestrand er vararepresentant nr. 1 for Hordaland for 2017-2021. Han debuterte i stortingssalen i november 2017, og møtte fast frå 14. januar til 3. april 2020. Då var han med i Kontroll- og konstitusjonskomiteen.