Får 660.000 til trafikksikring

Éin av dei tre søknadane frå Kvinnherad kommune nådde fram då fylket fordelte midlar til trafikksikring.

Trafikktryggingsutvalet i Vestland fylkeskommune, der Gunnar Moland (H) er fast medlem, hadde møte 9. januar. Éi av sakene omhandla den statlege tilskotsordninga til trafikksikre skulevegar og nærmiljø 2025. Det hadde kome inn 24 søknadar. Av desse var 19 frå kommunar og fem frå Vestland fylkeskommune. Den samla søknadssummen var på om lag 17,9 millionar kroner.

Utvalet følgde innstillinga og løyvde i alt 6,8 millionar kroner til 11 av tiltaka. Kvinnherad kommune kan såleis sjå fram til 660.000 kroner øyremerka fortau og snuplass ved skular. Heilt konkret betyr det fortau frå rådhuset, forbi apejungelen og ned til Rosendal ungdomsskule. Det skal også koma ei snulomme ved skulen. Tilskotet utgjer halvparten av den estimerte kostnaden. Ifølgje Tore Nerhus i Kvinnherad kommune betyr løyvinga at prosjektet snart kan lysast ut på anbod.

Kvinnherad hadde også søkt om 90.000 kroner til tryggare trafikkavvikling ved Øyatun skule/busslomme i Sæbøvik sentrum, samt 190.000 til flytting av autovern og kryssingspunkt på Jens Røsland-vegen på Husnes. I saksutgreiinga blir begge dei sistnemnde omtalte som gode prosjekt, men dei nådde ikkje opp i prioriteringa.