Mathilde (27) får liv i lokale som har stått tomme i årevis

Mathilde Petterson Mikkelsen har heilt sidan ho var lita visst kva ho skulle driva med, og no er ho i ferd med å realisera barndomsdraumen sin.

Allereie som barn var ho med bestemor Reidun Håvik i salongen hennar på Kaldestad. Mathilde Petterson Mikkelsen starta på ungdomsskulen fekk ho lov til å hjelpa til i salongen, då med å tørka støv og vaska hår. Etterkvart vart Mathilde svolten på utfordringar, og fekk prøva seg på både klipping og farging.

– Bestemor har alltid vore mitt store førebilete, og eg har ho å takka for at eg har visst kva eg skal bruka livet mitt på, smiler Mathilde frå Sunde.

Stor respons

Saman med huseigar, som Mathilde fortel har vore meir enn hjelpsam, er ho no godt i gang med å pussa opp lokala som snart skal husa hennar heilt eigen frisørsalong. Lokala er i Sæbøvik sentrum, like mellom Gaver og Leiker og gjenbruksbutikken Plant Eit Tre. Mathilde delte nyhenda med venner og familie på Facebook for nokre dagar sidan. Der blei det enorm respons, og frisøren vedgår at ho felte nokre tårer.

– Eg er heilt sjokka over tilbakemeldingane eg har fått og mengda har vore heilt vill! Det smelter hjarta mitt med så mange flotte meldingar, der folk seier dei er stotlte og at dei har trua på meg og prosjektet mitt. Eg blei faktisk så rørt då eg las det, at eg byrja å grina, fortel ho.

Godt samarbeid

Sundebuen har jobba som sjølvstendig næringsdrivande sidan 2019, men har jobba som frisør i Frisørkjellaren til Jane Irgens i Eidsmarka sidan 2018.

– Eg hadde læretida mi på Stord, men gjekk ikkje opp til fagprøven før eg hadde vore ei stund hos Jane. Det var ho som motiverte meg, heia på meg og fekk meg til å ha tru på meg sjølv. Eg hadde kvia meg så lenge, men eg bestod med toppkarakter, og eg er veldig takksam for den støtta eg fekk hos Jane, smiler Mathilde, og legg til:

– Det gode samarbeidet mellom Jane og meg skal halda fram sjølv om eg no har flytta ut, og vi har planar om mellom anna felles kundekveldar og reising. Og kjem det nokon innom hit som ber om ei behandling som eg veit Jane er betre på, så sender eg dei berre til ho, smiler Mathilde.

Eigen salong

No er Mathilde altså veldig snart klar til å satsa for seg sjølv, og med det realisera noko som har vore draumen hennar frå ho var ei lita jente.

– Eg har bestilt møblar som eg er veldig spent på om kjem i tide, så dersom alt går knirkefritt med levering, er det 3. februar som blir opningsdagen, fortel den ferske salongeigaren.

Ikkje alle detaljar er spikra enno, men det trur Mathilde vil ramla på plass etterkvart. Dei sentrale lokala på Halsnøy har også tidlegare husa frisør, men har stått tomme i ei årrekkje. Mathilde håpar på sikt at ho skal klara å bygga opp eit senter for skjønnhet og velvære, der ho kan tilby kundane ein rekke ulike tenester.

– Eg har med prøving og feiling funne ut kva behandlingar eg likar best å halda på med, og i tillegg til dei vanlege frisørtenestene, tilbyr eg også vippeforlenging, vippeløft, brynslaminering. Det er også grunnen til at tida var inne for å satsa no, ettersom eg har leigd eigne lokaler til vipper og bryn på Sunde, og dermed pendla att og fram. På sikt håpar eg også at det kan bli fleire behandlingar eller éin frisør til her, fortel Mathilde, som har eitt ledig behandligsrom der det er plass til såkalla benkebehandlingar, i tillegg til ein stor og luftig salong.

For den dyktige frisøren er det brudebehandling som står øvst på lista over det ho likar aller best.

– Eg gler meg til å driva endå meir med det no, og kunna tilby ein brudesalong til kundane. Allereie har eg tre-fire bookingar for den komande bryllaupssesongen mellom mai og september, smiler ho.

Ein stad for alle

Dessutan satsar ho breitt, og håpar at også menn skal vera ein del av målgruppa hennar.

– Eg har god trening og kursing innan mellom anna skjegg, «barber» og såkalla «skin fade», og det er noko eg synest er veldig kjekt å halda på med. No jobbar eg med eit salongnamn som ikkje er for feminint, for det er viktig for meg at alle skal kjenna seg komfortable med å koma hit, legg frisøren til.

Allereie har Mathilde ei solid kundeliste, og trur at ein ekstra frisør i Kvinnherad slettest ikkje er å forakta.

– Det er absolutt noko det er bruk for i kommunen. Her er det få frisørar og mange folk. Det kan ein også sjå på timelista mi, som allereie har god dekning, fortel ho.

Gler seg til kvar dag

At kundane er nøgde med Mathilde, og vil halda fram med å gå til ho - sjølv i ny salong, er ikkje vanskeleg å forstå. Ho prøver nemleg alltid å tilby det lille ekstra for at dei skal bli nøgd.

– Kvar partalsveke skal eg ha kveldsope to dagar i veka. Det har eg allereie hatt medan eg har vore i Frisørkjellaren, og det er noko kundar med ein vanleg 7 til 15 jobb set pris på. Det var nokre av kundane mine som måtte bruka feriedagar på å gå til frisøren, og det syntest eg var dumt, seier ho, som kan legga til at det fort blir lange dagar.

– Det hender eg jobbar 12 timars arbeidsdag når det er kveldsope, men sidan eg elskar jobben min, så går det veldig greitt. Eg har vore i bransjen i fleire år no, og likar det berre meir og meir. Eg gler meg kvar dag til å gå på jobb, sluttar ho.