Gode elevtal på Valekrossen: - Har hjelpt meg vidare i livet

I år er det 24 elevar som går på Valekrossen.

Onsdag inviterte Valekrossen igjen til open dag på skulen sin. Valekrossen er som kjent ein avdeling hos Kvinnherad Vidaregåande skule, og tilbyr tilrettelagd skuleløp for elevar som treng det.

I år blei ikkje den opne dagen like travel som tidlegare år.

– Eg trur nok det er fordi dei fleste kjenner godt til oss no, smiler avdelingsleiar Hanna Haugan Solheim.

Dei siste åra har nemleg skulen gått bredt ut for å markedsføra seg, og kan no sjå resultatet av dette.

– Vi starta skuleåret med 28 elevar. No er dette talet 24. Ein skal ikkje langt tilbake før det var kring åtte-ti elevar her, så vi har hatt ein solid auke, seier avdelingsleiaren.

Elevane representerer no også ein langt større del av Sunnhordland enn kva som har vore vanleg tidlegare.

– Eg trur vi har nådd taket for elevtal, og har igrunn ikkje plass til så mykje meir. Med det sagt så vender vi ikkje ryggen til dersom nokon treng hjelp, legg ho til.

Betyr mykje

Elevane Geirmund Høisæther (28), Connie Eliin Taranger (19) og tidlegare elev Malin Bakke Eik (26) var alle til stades under den opne dagen.

Dei er einige om at Valekrossen har vore til god hjelp for dei.

– Det har betydd mykje for meg, og har på mange måtar hjelpt meg vidare i livet i ei tid der det var vanskeleg å vita kva eg ville og kvar eg skulle, seier Bakke Eik.

Sjølv om ho ikkje lenger er elev ved Valekrossen, fortel ho at det framleis er ein god og trygg plass å koma til.

– Ein kjenner seg jo litt heime her, smiler ho.

I dag er dei tre elevane engasjerte i Mental Helse Ungdom, og Bakke Eik fortel at fleire frå styret i foreininga møttest på Valekrossen.

– No har vi blitt ein god gjeng som kjem saman kvar fredag, for eit rusfritt arrangement med spel, film og prat. Der er alle velkomne, lokkar ho.