Godt oppmøte på eldrekafé: – Behovet er der

Allereie klokka 14 måndag var det om lag 30 personar som venta på eit godt måltid hos Gjøa.

Men fleire hadde planar om å koma innom etterkvart, kunne Grethe Brundtland i eldrerådet fortelja, som hadde fått fleire telefonar frå interesserte. Mellom klokka 14 og 16 var det nemleg duka for eldrekafé, og i dette tidsrommet kunne dei over 60 år koma innom Gjøa for å få seg eit godt måltid til ein rimeleg pris.

Tilbod til dei eldre

Eldrerådet i Kvinnherad har i lengre tid jobba med å få til ei ordning med middagar til heimebuande pensjonistar, men då dette viste seg å bli utfordrande, ønskte likevel rådet å kunna tilby noko anna. Resultatet blei eldrekafè kvar måndag.

– No får vi sett kor stor interesse det er for tilbodet, og nett no ser det veldig lovande ut, smilte Brundtland, som elles rosa Gjøa.

– Det har vore veldig kjekt å samarbeida med dei, og vi er svært takksame for at dei ville bli med på dette, sa ho.

Dei frammøtte kunne velja mellom tre ulike hovudrettar; krema fiskesuppe, steinbit eller frikadeller i brun saus. Til dessert var det fransk terte med anten appelsin- eller sjokoladesaus.

Sosialt

Dei tre venninne Ellen Totland, Ingrid Skeie og Ingrid Høyland blei overraska over valmoglegheitene.

– Det er kjekt med eit slikt tilbod. Det gjeld for alle over 60, men spør du oss er 60-åringane berre ungdommar, smilte dei tre damene med eit glimt i auga. Alle tre i slutten av 80-åra.

– Trur de at dette blir ein fast vekestradisjon for dykk?

– Håpar det! Vi får sjå om maten er god, smilte Høyland.

Også dei tre venninnene Grete Haugen, Kirsten Telnes og Astrid J. Gjerde hadde tatt turen til eldrekafé, som alle tre hadde gått for fiskesuppe denne dagen.

– Det verka å vera eit kjekt tilbod, og behovet er der. Det er kjekt å få koma saman slik som dette, og ein flott måte å møta nye menneske på, sa Haugen, som fekk full støtte frå Telnes og Gjerde.