Nei, eg veit ikkje betre, Lars Børge

I eit innlegg av Lars Børge Sæberg skuldar han meg for gjennom dei to siste innlegga mine å vita betre enn det eg gav uttrykk for. Eg har mine særlege grunnar for å skriva som eg gjorde, noko eg ikkje skal utdjupa nett i dag. Truleg har Lars Børge òg sine særlege grunnar, dei skal me heller ikkje koma inn på.

Han skuldar meg for å vera svært usakleg, og at eg går til kraftige angrep på ei heil yrkesgruppe. Og at eg som tidlegare politikar veit betre enn dei fleste at byråkratane sine oppgåver er å sjå til at politikarane sine retningslinjer vert følgde. Og at byråkratane er der for å sikra at alle så langt råd vert handsama likt. Og at om nokon er usamde i det som byråkratane gjer, må skytset rettast mot politikarane som vedtar lovane. Etter beste evne skal eg svara kort på desse skuldingane.

Ordet sakleg betyr å halda seg til saka, det har eg definitivt gjort. Ordet usakleg er normalt noko som blir brukt om motstandaren i staden for saklege argument. Det trur eg må vera tilfelle her. Eg kan iallfall ikkje sjå at han har brukt eit einaste argument for påstanden. Frå andre har eg berre fått ståande ovasjonar for det første innlegget mitt.

Hoppa over

Går eg til angrep på ei heil yrkesgruppe? Altså byråkratane? Han må ha hoppa over annakvart avsnitt for å kunna konkludera slik. Eg skreiv om byråkratistane, som berre er ein liten del av byråkratiet. Det siste innlegget mitt gjekk nett på det, å definera byråkratistane som gruppe, dei som misbruker makta si, som ikkje følgjer dei lovane som han nemner, men som lagar sine eigne lovar.

Eg har brukt mange høve i det siste til å skryta uhemma av mange byråkratar, for dei aller fleste gjer jobben sin samvitsfullt, noko eg gir dei all ære og ros for. Men er altså ikkje desse eg er opptatt av no i januar, av grunnar som sikkert vil bli kjende etter kvart.

At byråkratane er der for å syta for at alle blir behandla likt, har han heilt rett i. Det er berre ein liten hake, nemleg at det finst drøssevis av eksempel på at det ikkje skjer. Og det er ikkje den samvitsfulle byråkraten, den som eg altså kjenner mange av, som står bak dette. Nei, det er byråkratisten. Som styrer etter sitt eige hovud.

Bruka makta

Så seier han at eg heller må retta skytset mot politikarane, for å få dei til å endra lovane. Eg rettar gjerne skytset mot politikarane når det trengst, men ikkje i dette høvet. For eg har faktisk ikkje noko å utsetja på lovane, så langt eg kan sjå er dei veldig gode. Viss ein bruker dei slik dei skal, vel å merka. Og det gjer dei samvitsfulle byråkratane. Men altså ikkje byråkratistane.

Skytset rettar eg nok likevel i stor grad mot politikarane no om dagen, men ikkje i det offentlege rom. Ikkje førebels iallfall. Men det er ikkje for at eg vil ha endra lovane. Det er fordi at det er politikarane som har all makt når det gjeld å styra byråkratiet.

Eg vil altså at politikarane skal bruka den makta dei faktisk har. Og at dei skal ta makta tilbake frå byråkratistane. Nett slik loven seier.

Eg veit faktisk ikkje betre enn det, eg, Lars Børge.

15.01.2025

Arne Gjerde