Sunnhordlandsaksjonen for Kamerun

I 2025 er det hundre år sidan NMS starta opp misjonsarbeidet i Kamerun. Det var lenge eit av dei landa NMS hadde størst misjonsarbeid i. På 1970-talet var der 70 vaksne utsendingar og 70 born. I dag er der ikkje faste misjonærar frå NMS, men støtta vert halde oppe gjennom arbeidet gjennom den lokale kyrkja, Den evangelisk-luthersk kyrkja i Kamerun (EELC) og ved konsulentar til avgrensa og spesielle oppgåver. I dag er denne kyrkja ei livskraftig kyrkje med vel ein halv million medlemmer. Eit stort arbeid med eit godt resultat.

Hovudfokus er: Evangelisering og teologisk utdanning, inkluderande utdanning, konfliktførebygging gjennom dialog og berekraftig miljøarbeid.

Konkret kan vi nemna: Døveskulen i Ngaoundere var eit nybrotsarbeid for ein del år sidan. Eit revolusjonerande arbeid for born som før vart gøymde bort som mindreverdige på grunn av si funksjonshemming. Flott at misjonen kan lyfta menneskeverdet slik.

Radiostasjon

NMS støttar radiostasjonen Sawtu Linjiila om er eit samarbeidsprosjekt mellom protestantiske kyrkjer i Nord-Kamerun og nabolanda. Her er hovudtema: bibelundervising, dyrehald, helse, hygiene og utdanning.

Kyrkja i Kamerun er spesielt oppteken av å fremja fredeleg sameksistens mellom ulike folkegrupper, både kristne og muslimar.

På grunn av krig og store konfliktar i Mali, har ikkje NMS faste misjonærar i landet no. Men to misjonærpar og direktøren i Den evangelisk-lutherske misjonen i Mali (MELM) er sendt ut frå kyrkja i Kamerun for å arbeida i Mali. Dei freistar å byggja kristne fellesskap mellom fulanitalande. Dei gjev trusopplæring til nye kristne, og oppmuntrar til å bruka talenta sine i lokalsamfunnet.

NMS støttar òg opp om arbeid mellom foreldrelause born og andre sårbare born med fosterheimar, økonomiske tilskot og helsearbeid. Det er mange slik born etter aids-epidemien som ikkje har nære familiemedlemmer.

Livskraftig

Kyrkja driv evangelisering i område som enno ikkje er nådde med evangeliet. Her vert det satsa på bibelskular og bygging av nye kyrkjelydar.

Vi ser at det er ein livskraftig 100-åring som gjer ein stor innsats for evangeliet om Jesus, og støtte og hjelp til menneske som treng ulik støtte for å verta tatt vare på og lukkast, sjølv om dei var fødde inn i fattigdom og utanforskap.

Velkomne til møte og gudstenester i ditt område der det vert invitert til samling. Takk for at du vil støtta dette viktige arbeidet som aldri går ut på dato.

Sunnhordland område for NMS

Gunnvald Bjotveit

leiar