Slik såg det ut då Spritz opna dørene

Nydeleg interiør og topp stemning på nysatsinga på Halsnøy.

Venninnene Bodil Fjelland og Beate Eriksen var dei aller første kundane då Spritz opna dørene fredag kveld. Dei var ute i god tid for å sikra at dei fekk ein sitteplass, men vedgår at dei kanskje overdreiv litt.

– Vi var her ein halvtime før tida, og hadde innstilt oss på at vi måtte stå i kø, men det slapp vi heldigvis. Kanskje litt vel ivrige, lo Beate.

– Dette er jo nett som i ein by, for nokre flotte lokale. No må eg nok byrja gå ut meir enn to gonger i året, lo Bodil.

– Eg har faktisk hatt eit nyttårsforsett, og det er at eg skal drikka meir. Eg er ei travel mormor, og drikk alt for lite, kom det spøkefullt frå Beate.

– Vi har venta på ein plass der også vi vaksne kan føla oss vel, sa Bodil, som hadde valt å heidra den nye utestaden med å gå for ein Aperol Spritz denne kvelden.

God stemning

Frå klokka 20 var det ein jamn straum med gjester, og allereie eit kvarter seinare var det godt belegg - og ikkje minst god stemning blant både gjester og tilsette.

Drivarane Marielle Sjo og Fredrik Berntsen var spente og klare for storinnrykk. Fredrik stod i døra og ønskte folk velkomne, medan Marielle stod klar bak bardisken.

– Vi er ganske sikre på at det kjem til å fylla seg godt opp her i kveld, smilte Fredrik, medan det stadig strøymde fleire folk til.

Flott interiør

Den siste tida har ekteparet stått på, saman med gode hjelparar, for å få lokala klare til fredagens opningsfest. Og gjestene la godt merke til innsatsen som hadde blitt lagt ned her.

– Eg likar stilen! Det er utruleg flott her, smilte Inger-Helene Mortveit Sjo, som fekk støtte frå vennina Synne Fjelberg Benjaminson.

Dei gledde seg også til at den lokale trubaduren Kristian Vaaga skulle gå på scena litt seinare på kvelden.