Releasekonsert i Rosendal

I slutten av januar kjem Thom Hell til Rosendal for å halda to konsertar. Dette blir attpåtil hans fyrste tur på scena etter albumsleppet.

Før jul arrangerte den nyskipa organisasjonen Rosendal kultur to konsertar med Daniel Kvammen. Begge vart utselde straks billettane kom for sal. Samstundes opplyste leiar Ingve Hesjedal at neste artist blir Thom Hell. Fredag 31. januar kjem han til Nyasago i Gurinefjæro for å halda intimkonsert saman med gitaristen Ronny Yttrehus.

No er det klart at arrangementet blir ekstra spesielt.

– Dette blir releasekonserten hans, noko som er veldig artig for oss. Han markerer 20 år som artist med å sleppa ny plate ved midnatt dagen før. Det er vist slik dei gjer det i musikkbransjen at plateslepp skjer natt til fredag, dei kallar det «New Music Friday», fortel Ingve Hesjedal.

Den nye plata blir den 13. frå Thom Hell, og har fått namnet «Candy».

Ute og venta

Medan Daniel Kvammen opphavleg var sett opp med éin konsert, satsar Rosendal kultur denne gong like godt på to konsertar frå start av.

– For nokon passar det å gå tidleg, for andre seint, så no kan folk velja sjølve. Og så vert det tre timar mellom konsertane. Då Daniel Kvammen spelte, var det berre ein halvtimes pause. Det gjorde at folk som skulle på den andre stod ute og venta medan den fyrste framleis pågjekk. Heldigvis var det fint vêr, i motsetnad til helga etter, så det var ingen som hutra og fraus. Men det er lov å ha flaks. Vi får kalla det nybyrjarflaks, smiler Hesjedal.

Neste konsert

Han antydar elles at det ikkje treng verta lenge til neste arrangement frå Rosendal kultur si side.

– Ja, det dukkar sikkert opp noko seinare i vinter og vår. Vi blir stadig kontakta om artistar som vil spela i Rosendal, og det er jo veldig kjekt. Så vi går på med friskt mot, seier Hesjedal.