Totalt overlegne i toppkamp

Tina Abdulla og Storhamar nøyer seg ikkje berre med NM-triumfen. No har dei også ferten av seriegull.

Torsdag kveld møttest to av topplaga i eliteserien til dyst. Då tok Storhamar i mot Sola på Hamar. Etter 13 minuttar stod det 6-6, men det var også siste gong det var spennande. Resten av kampen dominerte vertane. Ved pause var stillinga 13-9, medan sluttresultatet vart 25-15. Med andre ord knuste Storhamar motstandaren med heile 10 mål.

Overskrifta i Hamar arbeiderblad fortel det meste: «Lagde hakkemat av gullrivalen – slapp inn ett mål på 18 minutter!».

Ifølgje rapportane leverte Tina Abdulla frå Husnes ein svært god kamp, og fullstendig nøytraliserte Sola si landslagsstjerne Camilla Herrem. Tina noterte seg for tre mål.

Eitt poeng bak

Storhamar har framleis ikkje tapt i årets sesong, og står no med ni sigrar og to uavgjorte. Klubben har like mange poeng som Sola og ligg eitt bak det gamle storlaget Larvik, men begge dei sistnemnde har spelt éin kamp meir.

Dermed er Storhamar i rute til å vinna serien for aller fyrste gong. Det vil i så fall bety litt av ein siste sesong i Storhamar for Tina Abdulla, for i romjula vann dei også cupen for fyrste gong. Vi skal heller ikkje gløyma at dei vann Europaligaen 2023/24.

På søndag spelar Storhamar heimekamp igjen. Då møter dei Nykøbing i Champions League.