Ber om brøyting innover fjellheimen

Kommunestyrerepresentant Gunnar Helleland ynskjer oftare brøyting av vegen i retning Blådalen.

I ein e-post opplyser Gunnar Helleland (INP) at han har sett på ordføraren sin kalender at han skulle i konsesjonsmøte med SKL på torsdag. Akkurat det opplyser ordførar Vegard Bjørnevik (H) er ei mistyding, for det var berre eit internt møte på rådhuset gjeldande SKL sin søknad om nytt kraftverk som stod på programmet.

Men saka Helleland tek opp er uansett relevant nok. Det handlar om brøyting innover vegen til SKL.

«Det er mange som nyttar naturen innover fjellet på ski, både lokale og turistar. Vi i INP har i programmet vårt at vi skal jobba for at denne vegen vert brøyta lengre på tidleg vinter, og tidlegare på våren rundt påsketider. Det er fleire grunnar for at vi ynskjer dette», skriv Helleland.

Avbøtande tiltak

Han nemner to konkrete årsaker:

«1. I desember kan det vera lite snø i Fjellhaugen-området, men bra med snø når vi kjem inn til Storbjørnslio. Viss SKL kunne halde denne vegen open fram til jul, så ville dette gagna eit stort tal ivrige skisvingarar. Dette gjeld både tilreisande og lokale, og kan vera eit bra tiltak for å få endå fleire turistar til å ta turen til dei flotte fjella vi har i Kvinnherad.

2. På våren er det i mange sine auge den flottaste tida til å ta seg til fjells på skiturar, sokalla vårskiturar. Viss SKL hadde brøyta til Storbjørnsli til påske, så hadde dei med dette opna eit fantastisk stort og flott område, rett og slett eit eldorado for skientusiastar».

Gunnar Helleland meiner dette er tiltak som kostar SKL lite, og som kan vera eit avbøtande tiltak for nye anlegg som ser ut for at kjem oppi fjellheimen vår.

«Håpar ordføraren ser nytteverdien i dette, og tar det opp med SKL», avsluttar Helleland.

Konkretisera

Til Grenda fortel Vegard Bjørnevik at kommunen kan sjå på saka.

– Det har kome fleire innspel om dette før også. Eg trur det har vore ein meir uformell avtale om brøyting tidlegare, men vi kan gjerne prøva å konkretisera det. Fyrst må vi avklara kva vi kan og vil, seier han.

Bjørnevik legg til at politikarane også ynskjer ein heilskapleg plan for utviklinga av heile Fjellhaugen-området, og kan sjå på moglegheitene i den samanheng.