Framleis ikkje noko sluttoppgjer frå Krokatunellen

Måndag var det møte i Kontaktutvalet for Kvinnheradpakken. Her skulle representantane endeleg få vita sluttoppgjeret frå byggjeprosjektet med Krokatunellen, så dei kunne planleggja budsjett for aktiviteten vidare.

– Møtet var utsett frå desember fordi sluttoppgjeret frå Kroka ikkje var klart då. Men tala er framleis ikkje klare, og me fekk vita at me ikkje vil få denne informasjonen før tidlegast i mars, seier Vegard Bjørnevik.

Det er Vestland Fylkeskommune som er byggherre for Krokatunellen. Dei er i forhandlingar med entreprenøren om korleis oppgjeret vert sjåande ut til slutt.

– Er det usemje i desse forhandlingane, sidan ein stadig må venta på eit svar?

– Nei, det veit eg ikkje, me fekk lite informasjon om det. Men det er kjedeleg, for kommunestyret treng desse tala for å kunna planlegga vidare. Dette fekk me også sagt ifrå om til dei som sit og forhandlar, seier ein noko oppgitt ordførar.

Sæbøvik-Eidsvik

Det neste som alt er planlagt av oppgradering, gjeld Kaldestadvegen. Her nærmar det seg anbodsrunde.

– Det positive her er at me er klare for å setja i gang anbodskonkurransen til Kaldestadvegen innan ein månad, forsikrar Bjørnevik, og held fram:

– Sæbøvik-Eidsvik er neste prosjekt på blokka, men her må kommunestyret vita kor mykje me har igjen av midlar i Kvinnheradpakken, før ein kan gjera noko meir. Det har jo vore snakk om å vurdera eventuelle andre finansieringsmoglegheiter, men me må uansett vita kva me har i utgangspunktet.