Test av naudvarsel på onsdag
Både politi og sivilforsvar skal testa varslingssystema sine i morgon.
Onsdag rundt klokka 12 skal politiet testa systemet Naudvarsel på mobil. Det inneber at mobilar over heile landet kjem til å vibrera og spela av ein høg lyd. I tillegg skal sivilforsvaret testa tyfonane i Norge, med signalet «viktig melding - søk informasjon».
I eit innlegg på Facebook oppmodar Kvinnherad kommune om at bodskapen blir delt i sosiale kanalar, slik at flest mogleg på førehand veit om testen og er førebudde.
Artikkelen held fram under annonsen.
«Ein så omfattande varslingsprøve vil høyrast godt, spesielt der mange menneske er samla og mange einingar vil spela av lyd samstundes» skriv dei.
Ifølgje nodvarsel.no, ei nettside som er drifta av Direktoratet for samfunnstryggleik og beredskap, står det at naudvarselet på mobil blir testa både for å gjera befolkninga kjend med korleis det funkar, samt for å sikra at systemet fungerer som det skal. I ein reel situasjon inneheld eit naudvarsel informasjon om kva som skjer, og kva du bør gjera for å beskytta deg sjølv.