Nytt smittetilfelle i Kvinnherad - forventar fleire i tida som kjem

Onsdag kveld vart det tredje smittetilfelle av koronaviruset stadfesta i Kvinnherad. Kommuneoverlegen forventar fleire positive prøvar i tida som kjem.

Torsdag morgon melde Kvinnherad kommune på sine nettsider at det tredje smittetilfelle av koronaviruset var påvist i Kvinnherad.

– Det stemmer. Vi antek at smitten kjem frå utlandet eller frå ei flyreise. Då ikkje av pasienten sjølv, men frå ein annan i husstanden, seier kommuneoverlege Glenn André Opland til Grenda.

Nærkontaktane av den smitta personen skal testast i løpet av torsdag.

– Det er symptom, så det vert gjennomført testing i løpet av dagen i dag, seier Opland, som også skryt over familien til den no smitta personen.

– Dei gjorde alt rett, og har heldt seg i karantene, seier Opland.

 

Stengjer uteområde ved skular og barnehagar

Han opplever at folk generelt sett er veldig flinke, men kommunen har fått inn meldingar om at folk oppheld seg på skule- og barnehageområde på ettermiddagane. Det skal ein ikkje gjera.

– Vi kjem til å henga opp plakatar ved skular og barnehagar som seier at dei uteområda er stengt også på ettermiddag- og kveldstid. Elles så tenker eg det er greitt om folk held seg vekke frå varer som ligg opent for alle, som smågodt og wienerbrød. Ein bør klara å halda seg vekke frå det i ein periode som følgje av smittefaren der. Eg ville ikkje spist smågodt no, i alle fall, sluttar kommuneoverlegen.

 

På kommunen sine sider kjem dei også med ei oppmoding til innbyggjarane om å følgja FHI sine retningslinjer.

- Hald avstand frå kvarandre

- Hald deg mest mogleg heime

- Sørg for god handhygiene og hostevanar til kvar ei tid