Frå 53 til 3 barn i Sunde barnehage

I Sunde barnehage er det berre tre barn som har eit tilbod om dagen. Resten må aktiverast heime, det gjeld også barnehagen sine tilsette.

Som i kommunen sine andre barnehagar, er det uvanleg stille i Sunde barnehage om dagen. Det har det vore sidan kvardagen til så mange blei snudd på hovudet då regjeringa bestemte seg for å stenga alle skular og barnehagar torsdag i førre veke.  .

Det betyr at alle dei 53 barna, som til vanleg leikar i Sunde barnehage på føremiddagane, no er heime.

– Alle bortsett frå tre. Vi har tre barn som har behov for barnehageplass enkelte dagar som følgje av at dei er barn av helsepersonell, og har fått det innvilga. Dei dagane dei er her så har vi også to tilsette som er klare til å ta i mot, seier styrar Grete Kjerpeseth i Sune barnehage.

 

Tek forholdsreglar

Sjølv tek ho seg av den daglege drifta av barnehagen, men har valt at kollegaene skal jobba heimanfrå.

– Dei kunne kome her og jobba, det hadde nok vore jobb til dei i form av praktiske ting. Og det er nok nokon som godt kunne tenkt seg å heller vore her og jobba. Men vi må ta våre forholdsreglar, og eg vil ikkje at dei skal gå her så tett på kvarandre, den viktigaste jobben dei kan gjera no er å vera med på dugnaden og jobba heimanfrå, seier Kjerpeseth.

Sjølv om barnehagen i teorien er stengt ned, er det framleis mange praktiske ting som skal gli som normalt.

– Vi har ein jobb å gjera med opptak, foreldrebetaling og andre praktiske ting som må gå som normalt. Det er sjølvsagt mindre jobb i desse tider, men det er nok å gjera, seier Kjerpeseth.

 

Held seg oppdatert

I tillegg til det praktiske, er det viktig å halda seg oppdatert på dei retningslinjene som til kvar ei tid gjeld.

– Eg føler at vi løyser situasjonen bra. Vi held oss oppdaterte på lovar, reglar og retningslinjer, så sender vi ut informasjon til foreldra. Førebels veit vi ikkje så mykje, men vi veit at vi skal halda stengt til 26. mars. Så får vi sjå, seier ho.

Elles har dei tilsette i barnehagen kontinuerleg kontakt. Og dei tilsette har fagstoff og planleggingsarbeid dei skal koma seg gjennom.

– For oss i ein barnehage så er det ikkje så lett å gje heimearbeid til barna, slik dei gjer på skulane. Men dei pedagogiske leiarane gir foreldra idear og tips til aktivitetar dei kan gjera med barna sine, sluttar Kjerpeseth.