Smak av India
På søndag får Uskedalen kyrkje besøk frå barneheimen Umred Children home i India.
Å støtta barneheimen er ei av hjartesakene til sokneprest Lina Håland, og ho har halde fleire konsertar i Kvinnherad til inntekt for arbeidet der. Søndag vert det både gudsteneste og kyrkjemiddag i Uskedalen, med besøk av leiarane ved barneheimen, ekteparet Essi og Mary David. Barneheimsleiarane vil fortelja om arbeidet ved barneheimen etter gudstenesta, og deretter blir det ein smak av India for alle som møter opp.
– Den eine dottera til Essi og Mary bur i Kristiansand, og ho vert kokke denne dagen. Ho lagar heilt nydeleg indisk mat. Førre helg var 40 mann til bords under eit liknande arrangement i Julabygda i Sandnes, fortel Håland.
Artikkelen held fram under annonsen.
Under kyrkjemiddagen vil Essi og Mary David fortelja om barneheimen og syngja nokre kristne songar på hindi.
– Folk må berre melda seg på, dette trur eg blir veldig, veldig bra, seier soknepresten i Uskedalen.