Treng meir aluminium
Norsk Hydro trur at miljøbløffen hjå Volkswagen kan føra til auka etterspurnad etter aluminium.
Grunnen til at Norsk Hydro trur på denne effekten, er at bilprodusentane ved å bruka aluminium i staden for stål, kan få ned vekta på bilane og dermed redusera drivstofforbruket.
– Det er enno tidleg å seia noko om kva utsleppsskandalen vil bety reint konkret, men det er ikkje tvil om at meir bruk av aluminium er ei god løysing for bilselskap som jaktar på lågare utslepp frå bilane dei produserer. Derfor kan dette faktisk resultera i ytterlegare auke i aluminiumsetterspurnaden frå transportsektoren, seier informasjonssjef i Hydro, Øyvind Breivik, i eit intervju med Adresseavisen.
Artikkelen held fram under annonsen.
Det vert vidare opplyst at Hydro ventar at etterspurnaden etter aluminium vil auka med mellom 25 og 40 prosent fram mot 2020. Men Breivik vedgår at metallprisane for tida er lågare enn det Hydro helst hadde sett.
– I eit lengre perspektiv er det ikkje tvil om at verda treng mykje meir aluminium, mellom anna for at bilane vi køyrer skal bli lettare og sleppa ut mindre CO2. Derfor har vi klokketru på framtida for vår produksjon, seier han i intervjuet.