Vil kutta tilskotet til Fjelbergruta

Også Rogaland fylkeskommune skal spara pengar. Det kan gå utover ferjestrekninga Sydnes-Fjelberg-Utbjoa.

For eit par veker sidan la fylkesdirektør Rune Haugsdal i Vestland fram sitt forslag til neste års budsjett og økonomiplan for komande fire år. For å spara pengar på kollektivtransporten, vart det tilrådd å ta bort eine ferja på både Ranavik-Skjersholmane og Gjermundshamn-Varaldsøy-Årsnes.

Måndag denne veka var det Rogaland fylkeskommune sin tur. Også deira fylkesdirektør Gunn Claire Westad meiner det må kuttast i kollektivtilbodet.

«Innanfor samferdselsområdet er det hovudsakleg to område kor det er mogleg å ta ned driftsutgiftene – drift og vedlikehald av fylkesvegnettet og kollektivtransport. I all hovudsak handlar det om å senka ambisjonsnivået og kvaliteten på tenestene vi leverer. Ved å ta ned rammene for driftsbudsjettet til samferdsel, kan innbyggjarane i Rogaland oppleva å få eit lågare tilbod enn kva dei er vane med i dag», skriv ho på fylket si heimeside.

Internsamband

Eit sparetiltak er å ta bort tilskotet til ferjesambandet Sydnes-Fjelberg-Utbjoa frå 2026. Sidan Utbjoa ligg i Vindafjord kommune i Rogaland, betalar dette fylket tilskot til Skyss for sambandet. Kva konsekvensen blir viss desse pengane forsvinn, er ikkje godt å seia, men truleg vil Utbjoa forsvinna som stoppestad. Dermed blir Fjelbergruta eit reint internsamband i Kvinnherad.

Fjelbergruta starta opp i 1972 med MF «Torefjell». Fram til 2020 gjekk ferja på enkelte avgangar også til Stord, fyrst Leirvik, seinare Skjersholmane. Sommaren 2022 vart ferja gratis.