Fiska i utløpet av Skålaelva – kan mista retten til å fiska med garn

To kvinnheringar skal i slutten av månaden møta i retten tiltalt for garnfiske i utløpet av elva i Rosendal.

Dei to kvinnheringane i 50- og 60-årsalderen er tiltalt etter Lakse- og innlandsfisklova § 49, for «grovt å ha brote regelen om at det i fredningssona utanfor 100-metersona frå elvemunningen» Skålaelva i Rosendal, der det heile året berre er tillate å fiske anadrom fisk med dorg, oter, stong eller handsnøre frå båt og land.

– Lovbrotet er grovt fordi det har ført med seg eller valda fare for betydeleg skade på naturmangfaldet og graden av skuld, skriv statsadvokaten i Hordaland og Sogn og Fjordane i tiltaleavgjerda.

Inndraging av båt

Hendinga vann stad i sommar, der det var sett ut fem garn på totalt 172 meter i overflata av sjøen, eller medverka til dette. Garna hadde ein maskestorleik på mellom 52 og 65 mm. På garna blei det fanga totalt fire sjøaure, tre humrar og samla sett rundt ti marine artar, går det fram av tiltalen.

– Det tas atterhald om påstand om inndraging av 5 fiskegarn, fangst og antatt verdi av tiltalte sin skjærgårdsjeep, sett til 40.000 kr, jf. straffelova § 69 jf. § 75 første ledd. Det tas atterhald om påstand om tap av rett til å drive fiske med garn for alltid, jf. straffelova § 56, skriv statsadvokaten i tiltalen.

– Førebels er det ikkje noko å kommentera i denne saka, seier Per Ivar Hessen, som er forsvarar for ein av dei tilsette.