Spennande familiedag med insekt og lauvtre

Insekt og lauvtre engasjerte små og store på familiedagen søndag 18. august.

Insekta som er den største dyregruppa på Jorda er viktige i alle økosystema. Dei omfattar mange arter som er avgjerande viktige for matproduksjonen til menneska, og dei knaskar i seg daude planter og treslag slik at næringsstoffa blir resirkulerte og tilgjengelege for nytt liv.

Insekta er fantastiske skapningar. Visste du at ein maur kan løfta 50 gonger meir enn eiga kroppsvekt? Eller at knotten sine venger slår 1000 gonger i sekundet? Men mange viktige insektartar er i sterk tilbakegang, også i Noreg, på grunn av tapte leveområde i skog og vatn og sprøyting med gift. På familiedagen ville ein bøta litt på dette, og det vart produsert insekthotell i ulike variantar.

Hobbyverkstad

Deltakinga på quizen om å finna namn på flest treslag i Steinparken var upåklageleg, trass i regnbyene. «No treng vi å vera ute» vart det sagt, men tydelegvis også kjekt å kroa seg ved peisen i Dinosaurhuset. Mange var nysgjerrige på den nye tretopphytta, Lerkereiret, og lurte på kor tid den skulle opnast. Det skjer forhåpentlegvis rimeleg snart når det føreligg ferdigattest.

Trass forferdelege vêrmeldingar var Steinparken full av folk, lokale så vel som tilreisande. Utifrå frammøte og engasjement kan det nok henda Steinparken treng ein liten hobbyverkstad.

Rosendalstiftinga takkar frammøtte og steinparkvener som gjorde dette til ein spennande dag.

Øystein Skaala