Nye driftsproblem for Varaldsøy-ferja

Torsdag ettermiddag kom det melding om nye driftsproblem for rute 2.

– Grunna driftsproblem vert ferje 2 i Gjermundshamn - Varaldsøy - Årsnes innstilt inntil vidare, meldte Fjord1 på vegne av Skyss klokka 1443.

Varaordførar Thea Vaage kjenner på frustrasjonen til innbyggjarane på Varaldsøy, og jobbar med å få til eit Varaldsøy-møte med fylkeskommunen, Fjord1 og Skyss.

– Den situasjonen som ein har altfor ofte for tida er veldig frustrerande. Me skal få til eit møte tidleg i haust, på Varaldsøy, der alle som bil kan koma. Det er mest så eg håper ferje 2 blir innstilt når me er på Varaldsøy, slik at dei som kjem til møtet frå byn får kjenna korleis dette er for innbyggjarane, seier Thea Vaage, som har fungert som ordførar dei føregåande vekene.

Ho vil ha med både fylkeskommunen, Fjord1 og Skyss på møtet, og jobbar med å finna ein dato der desse kan stilla. Møtet skal vera ope for alle som er interesserte i å stilla.

– Eg har snakka med Skyss fleire gonger den siste tida, utan vidare effekt. Eg er skikkeleg frustrert på vegner av bebuarane på Varaldsøy, sluttar Vaage.

Denne gongen gjekk driftsproblema over relativt raskt. Frå kl. 15.55 var ferje 2 tilbake i normal drift.