Politiet kjem med nok ei pass-oppmoding

Pågangen på å fornya pass er no så stor at passprodusenten ikkje lenger kan overhalda garantitida og levera nytt pass innan 14 dagar. Så skal du ut og reisa og sit med eit ugyldig pass må du berre koma deg til ditt næraste lensmannskontor.

– Ein skulle tru at dette eigentleg skulle gå av seg sjølv, men det ser det då altså ikkje ut til å gjera. Pågangen er no så stor at passprodusenten har sendt ut brev til oss i politiet at dei ikkje lenger kan garantera nytt pass innan 14 dagar, seier lensmann Jan Fosse ved Kvinnherad lensmannskontor.

Difor går Fosse no – igjen – ut og oppmodar alle som skal ut å reisa om å sikra seg at dei har gyldig pass.

– Skal du ut å reisa om ein månads tid er det sterkt å anbefala at du søker om nytt pass så fort som mogleg. Det er så mange som har bestillingar av nytt pass at passprodusenten ikkje har kapasitet til å levera nye pass i tide, sluttar Jan Fosse.