Grenda-journalist Rita Isdal Cunningham er død

Rita Isdal Cunningham frå Halsnøy er død, 53 år gamal. Ho jobba som journalist i Grenda fram til ho vart alvorleg sjuk.

Onsdag døydde Rita Isdal Cunningham etter å ha kjempa mot sjukdom i halvtanna år.

«Kjære vener. Dette er det vanskelegaste innlegget nokon kan skriva. Vakre, vakre Rita gjekk bort i går (onsdag) ettermiddag. I dag vandrar ho i paradis. Vi vil takka alle for dykkar kjærleik og venskap med Rita. Ho var ei eksepsjonell mor og kone, og ho hadde evna til å få alle ho møtte til å føla seg høyrt og sett. Vi saknar ho djupt», skreiv ektemannen John Cunningham på Facebook.

Rita Isdal Cunningham var født og oppvaksen på Halsnøy. Ho vart tilsett som journalist i Grenda i august 2022. Sidan ho sleit med sjukdomen ME, hadde ho innfunne seg med at ho ikkje kunne få jobb igjen.

– Eg er veldig takknemleg for at Grenda ringde og ville satsa på ein person med ME, sa ho då ho vart tilsett i 40% stilling.

Glade i ho

Rita hadde hovudfag i sosialantropologi, og i 2021 fullførde ho doktorgraden innan same fagfelt. Ho gjennomførde to feltarbeid, begge i London. Rita hadde eit kristent livssyn, og skreiv også litt for Kyrkjelydsbladet.

I januar 2023 vart det oppdaga alvorleg sjukdom, og Rita kom diverre aldri attende i arbeid.

– Det var tungt å få den triste nyheita om Rita sin bortgang. Sjølvsagt er det tyngst for familien, spesielt John og barna, men sjølv om Rita berre var hjå oss i kort tid, vart vi veldig glade i ho, og sette utruleg stor pris på å ha ho hjå oss, seier redaktør Håvard Sætrevik.

– Det har vore tungt å følgja kampen ho har kjempa frå sidelina. Dette er ein veldig trist dag, og all vår medkjensle går til John og den næraste familien, legg han til.

Gravferda er komande torsdag klokka 11.00 frå Eid kyrkje på Halsnøy.