Totland nominert til Bokslukerprisen
Bokslukerprisen er ein nasjonal leselystpris for mellomtrinnet, der over 120 000 elevar skal lesa utdrag av forskjellige bøker og stemma fram sin favoritt.
I år er Anders Totland med boka «Gunnars rekordbok» nominert.
– Det er ekstra kjekt å få vera nominert til denne prisen, då det er ungar i målgruppa som skal lesa og kåra ein vinnar, fortel forfattaren sjølv.
Artikkelen held fram under annonsen.
I samarbeid med klassane som skal lesa har foreininga !les landa på ti titlar dei håpar vil engasjera unge lesarar på mellomtrinnet.
– Det er veldig mange gode bøker som vert gitt ut i den målgruppa, så å vela ut berre ti stykke trur eg har vore diskutert ganske godt, seier Totland og legg til;
– Min favoritt av dei nominerte er nok «Villdyr» av Håkon Marcus. Ein slags ny generasjon norsk Harry Potter. Eg trur kanskje dotter mi heiar på den også.
Har allereie vunne
Totland er glad for å blitt nominert til prisen, og meiner at han allereie eigentleg har vunne.
– Eg har i grunn vunne ved å bli nominert. Det er skikkeleg fine bøker og gode forfattarar så for min del er det ein siger berre å vera nominert i lag med dei. Og så får eg sjå kva mange ungar synst om boka mi, fortel han og legg til;
– Eg er jo stolt over at dei har velt ut mi bok. Eg skriv jo bøker i håp om at flest mogleg vil lesa dei, og no blir den jo løfta fram for mange som sikkert aldri ville lest den elles.
«Det er eit variert utval med spenning, drama, humor, grøss, historie og fantasy. Det er fleire teikneseriar i år, i tillegg til godt illustrerte bøker. Her vil dei fleste finna noko dei likar, og forhåpentlegvis vil enno fleire oppdaga noko dei ikkje visste at dei likte», seier prosjektansvarleg for Bokslukarprisen i foreininga !les Christian Goveia Jacobsen på nettsidene til Foreininga !les.
Dei nominerte er;
Artikkelen held fram under annonsen.
Jakob på vippepunktet av Nina Borge, illustrert av Tonje-Mari Clausen. Gyldendal 2024.
Jenny Fender av Heidi Marie Vestrheim. Gyldendal 2023.
Gutta krutt og gledesdreperen av Alexander Istad, illustrert av Espen Meling Sele. Cappelen Damm 2023.
Ulv Ulv av Elin Viktoria Unstad. Vigmostad & Bjørke. 2023.
Jenter av Cathrine Sandmæl. Egmont 2024.
Full bajas av Ingunn Thon, illustrert av Maja Kjellstad Aanonsen. Samlaget 2023.
Villdyr av Håkon Marcus. Aschehoug 2023.
Gunnars rekordbok av Anders Totland. Vigmostad & Bjørke 2024.
Artikkelen held fram under annonsen.
Trivselslederen av Marianne Kaurin. Aschehoug 2023.
Max Manus av Andreas K. Iversen. Kagge 2024.