Harry Herstad er død
Stord-ordførar Harry Herstad døydde i 12-tida i dag. – Ein god kollega og ven som eg sette stor pris på, og dette er forferdeleg vondt, kommenterer Kvinnherad-ordførar Peder Sjo Slettebø.
Klokka 15.41 i dag la Stord kommune ut følgjande melding på si heimeside: «Det er med stor sorg me melder at ordførar Harry Herstad gjekk bort rundt klokka 12 i dag tysdag 2. mai. Harry Herstad døydde etter kort tids sjukeleie. Han vart sist fredag innlagt på sjukehus etter eit illebefinnande. Harry døydde med den næraste familien rundt seg.
Våre tankar går til familien. Familien bed om ro, og ønskjer ikkje å kommentera Harry sin bortgang. Alle politiske møte i Stord kommune denne veka vert avlyste.»
Artikkelen held fram under annonsen.
Sjuk under eit møte
I følgje avisa Sunnhordland vart Herstad på fredag akutt sjuk under eit møte i SIM sitt representantskap på Fitjar. Søndag gjekk Stord kommune ut med at det var uavklart om eller når Harry Herstad ville koma tilbake som ordførar.
Jakob Bjelland (Sp) er no fungerande ordførar, fram til kommunestyret formelt har valt ny.
Herstad vart født i 1946, og representerte Ap i politikken. I karrieren sin har han mellom anna vore rådmann i Stord kommune, fylkesrådmann i Hordaland, direktør i Sunnhordland kraftlag, direktør i Sportsklubben Brann og rådmann i Fitjar kommune. Ordførar på Stord vart han i september 2015.
Sorg og fortviling
Ordførar i Kvinnherad, Peder Sjo Slettebø, mottok meldinga med stor sorg.
Artikkelen held fram under annonsen.
– Det som var ein gledas dag for Kvinnherad har enda med stor sorg og fortviling over at ordførar Harry Herstad på Stord i dag gjekk bort. Han var ein god kollega og ven som eg sette stor pris på, og dette er forferdeleg vondt. Mine tankar, bøner og djupaste medkjensle går til familien, og eg sørger med Stord-samfunnet over tapet av ein synleg og engasjert ordførar. Takk for alle gode minne, kjære Harry, skriv han tysdag kveld på Facebook-sida si.