Vedtok billegare snøggbåt - har blitt dyrare. Ordføraren reagerer

Fylket har vedteke at snøggbåten mellom Sunde og Leirvik skal bli mykje billegare. Men 1. februar gjekk i staden prisen opp. Skyss lovar no at prisen skal ned i løpet av året, men veit ikkje når. Ordførar Vegard Bjørnevik krev eit klarare svar.

Den 23. november prenta Grenda ein artikkel med overskrifta «Nytt snøggbåtforslag: Billegare til Leirvik, dyrare til Bergen». Teksten var basert på fylkesdirektøren sitt forslag om såkalla prisstrategi for båtreiser i Vestland fylke. Han la opp til å innføra ein avstandsmodell, slik at båtreiser inntil 15 kilometer vert prisa tilsvarande busspris for ei sone. Deretter aukar prisen for kvar 7. kilometer.

For Kvinnherad ville framlegget bety at Sunde-Leirvik skulle ned frå 105 kroner til 40 kroner for enkeltbillett, og frå 183 til 80 for tur/retur. Samstundes ville dei lengre reisene, som Sunde til Flesland/Bergen og Rosendalsruta bli monaleg dyrare. Rett nok har fylkesdirektøren lova avbøtande tiltak for dei lengste strekningane.

I løpet av 2024

Mange forventa at då Skyss justerte prisane den 1. februar, så ville Sunde-Leirvik bli sett ned til 40 kroner. Det skjedde ikkje. I staden auka summen til 109 kroner. Grenda sendte difor førespurnad til Skyss om kvifor prisen har gått opp og ikkje ned? Slik lyder svaret:

– Ny prisstrategi er ikkje implementert enno. Men den er vedtatt, og det er vedtatt at den skal implementerast i løpet av 2024. Gamle prisar gjeld dermed enno, og desse vart justert opp 1. februar. Dato for implementering av ny prisstrategi er ikkje fastsett enno, opplyser kommunikasjonsrådgjevar/pressekontakt Karoline Rage.

Ho har heilt rett om tidsskjemaet, for i fylkestinget sitt vedtak frå midten av desember står det berre: «Det blir innført ny avstandsbasert prismodell for båt i heile Vestland fylke innan utgangen av 2024».

Tviegga

Ordførar Vegard Bjørnevik (H) er imidlertid ikkje nøgd med tilbakemeldinga frå Skyss.

– Når dei har vedteke ein ny prisstrategi, så bør den innførast så fort som mogleg. Med tanke på kor mange pendlarar og arbeidsreisande vi har til Stord, så må vi forventa at prisstrategien vert implementert snarast. Det er litt skuffande at dei ikkje kan seia kva tid dette skal skje; er det i mars, juli eller september? Dette må vi få svar på, seier Bjørnevik.

Han legg til at saka likevel er noko tviegga, sidan reisene til Flesland og Bergen i utgangspunktet skal bli dyrare. Uansett vil ordføraren ta saka opp med Kvinnherad sine representantar i Hovudutval for samferdsel og mobilitet i fylket, i tillegg til å venda seg direkte til Skyss og fylkesadministrasjonen.

– Eg har fått tilbakemelding om at mange er fortvila over prisauken, for 109 kroner er mykje pengar. At vi ikkje har fått skikkeleg svar, er ikkje godt nok. Dette må vi få orden på, avsluttar Vegard Bjørnevik.