Folgefonnsenteret inviterer i vinterferien
Folgefonnsenteret skipar til to familiedagar neste veke når vinterferien er i gang for alle skulane i kommunen.
Dette fortel fagleiar Sara Nonås Langhelle i ei pressemelding.
– Måndag 26. februar kan ein ta med borna for å sortera hovudbergartar og leika seg med U-dalar og V-dalar i «sandkassen», då med god hjelp frå ein vaksen. Prikkane og stripene i ein gråstein fortel oss korleis bergarten vart til, og ingrediensar i ein bergart blir kalla mineral, som igjen kan ha fantastiske fargar. Kanskje både liten og stor kan læra noko nytt? undrar Langhelle.
Artikkelen held fram under annonsen.
På onsdag 28. februar er det derimot småfuglane som kjem til å bli vigd merksemd.
– Småfuglane gler seg til våren, men enn så lenge set dei pris på noko ekstra godt på matfatet frå oss. På onsdag kan ein kome for å laga fuglemat av konglar, larvar og frø, lokkar Langhelle.
– Ved begge arrangementa vert det etablert ein koseleg lesekrok under trappa i utstillinga, quiz om dagens tema og teiknekrok for dei minste i kaféen. Vel møtt til kjekke vinterferieaktivitetar for heile familien, avsluttar ho.