Fryktar at gateljos vert fjerna

Den 1. januar overtek Vestland fylkeskommune etter planen ansvaret for alle vegljos langs fylkesvegane i Kvinnherad. Svale Naterstad fryktar at fleire enkeltståande ljos dermed vert fjerna.

I slutten av oktober etterlyste Svale Naterstad at Vestland fylkeskommune skulle koma og fiksa eit defekt vegljos på fylkesveg 5034 mellom Seim og Guddal/Naterstad. Det aktuelle ljoset står ved innkøyrsla til eigedomen hans, og vart montert på byrjinga av 80-talet.

– Kommunen sette då opp vegljos frå Seimsfoss og opp til brua, men hadde ikkje midlar til å fortsetja opp langs vegen. Men det vart avtalt at eg og ein nabo skulle få sett opp éin lampe ved kvar vår avkøyrsle, mot at vi dekka materialkostnaden og oppsetjinga. Det kosta oss 1.500 kroner, medan kommunen betalte drifta av ljoset, fortel Svale Naterstad til Grenda.

Fylkeskommunen ved kontrollingeniør Adrian Kasin svarte at lampen ikkje har nokon funksjon for fylkesvegen.

«Dette er både fordi lampen står vinkla innover mot privat eigedom og at det er eit enkeltståande lampepunkt som ikkje har nokon trafikksikkerheitsmessigt verdi», skreiv han tilbake til Naterstad.

Ikkje gunstig

Men Kasin opplyste også at fylket er i ferd med å overta ansvaret for vegljosa langs fylkesvegane som tidlegare har vore drifta av kommunar og kraftlag. I Kvinnherad er det planlagt overtaking 1. januar 2024. I samband med dette vil fylket føreta ei nyttevurdering av alle lampane.

«Enkeltståande lampepunkt er ikkje gunstige med tanke på trafikksikkerheit, og er derfor noko som Vestland fylkeskommune i utgangspunktet ikkje ynskjer å ha driftsansvar for framover. Bakgrunnen for det er at ein får godt ljos under lampen, men ein mørk sone før og etter kor ein blir mindre synleg, i tillegg kan nattsynet også bli unødvendig påverka. Vi har ingen konkrete planar om å krevja at desse vert fjerna, men vi kan sjølvsagt bistå med å få dei fjerna viss det er lampepunkt som ingen ynskjer å ta ansvar for», skriv han.

Adrian Kasin ber om å få tilsendt avtalen som Svale Naterstad inngjekk med kommunen på 80-talet. Viss ikkje slik avtale finst, lanserer han to alternativ: Å fjerna lampen, eller å overføra ansvaret for drift, vedlikehald og oppgradering til LED-ljos til Svale Naterstad.

– Det vart ikkje skrive nokon avtale, for alt var så mykje enklare den gongen, seier Naterstad til Grenda.

Ljosnes

Han imøtegår også påstanden om at enkeltståande ljos skal vera trafikkfarlege.

– Det finst ingen dokumentasjon på dette, så det er ikkje rett, seier mannen som sjølv jobba i Statens vegvesen i over 40 år.

Svale Naterstad er uroa for at fleire enkeltståande vegljos rundt om i Kvinnherad no kan bli fjerna, og trekkjer spesielt fram lampa som står på Ljosnes. Mange hugsar dessutan at fylket i oktober i fjor fjerna eit vegljos på Fatland på Halsnøy, eit ljos som innbyggjarane hadde samla inn pengar for å få montert.

– Saka vil ha betydning for ein god del innbyggjarar i Kvinnherad, for det er mange enkeltpunkt her i kommunen. Mange oppsitjarar vert råka viss fylket ikkje vil drifta desse ljosa, åtvarar Svale Naterstad, og ynskjer å gjera folk merksame på kva som er i ferd med å skje.

Glidande overgang

Terje Natland, einingsleiar for veg og park i Kvinnherad kommune, stadfestar til Grenda at fylket skal overta drifta av vegljosa langs fylkesvegane.

– Det har vore ein glidande overgang, for fylket har vore tydelege på at dei vil overta. Fylket har betalt straumkostnaden i mange år allereie, medan kommunen har skifta pærer og gjort vedlikehald, seier han.

– Kva konsekvensar kan endringa få?

– Kommunen vil få noko mindre midlar å leika oss med, men samtidig får vi lågare kostnader. Elles må vi prøva å få oversikt over kva som skal vera private eller offentlege vegljos, seier Natland, og trekkjer fram solcellepanel som ei mogleg løysing for dei som ynskjer private ljos.

– Kan ein risikera at fleire vegljos vert fjerna?

– Det kan nok skje, viss fylket ikkje vil ha dei. Men det kan ikkje eg uttala meg om.