591 trinn for æva

Sjølv om sherpaane no reiser frå Rosendal, kjem spora etter arbeidet deira til å liggja igjen i hundreår.

I fire veker har fire sherpaar frå Nepal jobba med å laga trapper opp mot Malmangernuten. Tysdag vart dei 591 trinna offisielt opna. Opninga stod Sonam Sherpa for, då han skar over eit sikringstau som var spent over stien.

– No treng me ikkje sikringstau for å koma oss frå Høyklepp til Hjort lenger, var symbolikken bak handlinga.

Tonnevis

I forkant av opningsseremonien ligg fire veker fysisk knallhardt arbeid utført av sherpaane. Tonnevis med stein er flytta med handmakt, lagt på plass med flid og tilpassa underlaget slik at stega passar for både kort og lang.

Noko stein har også blitt flytta med helikopter, for at sherpaane skulle ha materiale å jobba med. Steinane vart då først lasta oppi sekkar, som vart løfta på plass av Fonnafly.

– Det er ikkje eit trinn i trappa som har reist særleg meir enn 150-200 meter, så alt er framleis lokalt, sa Morten Nygård, leiar i turgruppa til Rosendal Turnlag under opningsseansen på øvre Høyklepp tysdag ettermiddag.

– Brattaste

Det er eit handverk som truleg berre dei få kan utføra. For før dei første minutta med jobb kan utførast, har sherpaane måtta ta seg opp til 521 meter over havet for å koma til arbeidsstaden. Stilengda er 237 meter, og trappene sluttar på 642 meter over havet.

– Dette er den brattaste plassen me har jobba. Det er berre det me gjorde på Romsdalseggja som kan måla seg, fortalte Sonam Sherpa under opningsseansen.

Sonam er i Norge for 17. gongen, og har fungert som arbeidsleiar og Geirr Vetti si høgre hand. Vetti eig firmaet Stibyggjaren AS, og organiserer arbeidet til sherpaane i Norge.

Opningsseremonien føregjekk kring 550 meter over Hardangerfjorden, og 60-70 store og små hadde tatt turen til fjells. Der vanka det takk til bidragsytarar, helsing frå Kvinnherad Turlag, heider til prosjektleiar Kåre Eik og song av sherpaane, som allereie dagen etter forflytta seg inn til Ullensvang for å jobba på neste prosjekt.

Ligg lenge

– At det vart eit nytt sherpa-prosjekt året etter dei ordna stien forbi Skarsklyp, er eigentleg utruleg. Med slik stien på Nuten har utvikla seg den siste tida, med stadig større slitasje og dårlegare og dårlegare underlag, var det nødvendig å få gjort noko snarleg. Spesielt når stien har vore sleip, har det nærast vore med helsa som innsats å gå ned frå Hjort til Høyklepp, forklarte Nygård under opninga, ein påstand som fjellfolket nikka anerkjennande til.

No går ein på fast, stødig stein, fordelt på 591 trinn.

– Dei kjem til å liggja i 500 år. Kanskje tusen år, sa Sonam under opninga.

Då er det berre å byrja å bruka dei.