19 mill. i underskot i fjerde kvartal - overskot for heile 2018

Høge råvarekostnadar og lågare metallpris trekk ned resultatet til Hydro Husnes i fjerde kvartal. Likevel kan dei visa til eit overskot på 22 millionar kroner for heile 2018.

– 2018 har vore prega av høgare prisar på råstoff, då fyrst og fremst alumina. Det har påverka lønsemda og i fjerde kvartal har vi no eit negativt driftsresultat. Nye og ukjente aluminakjelder har også gitt oss utfordringar, men organisasjonen har gjort ein formidabel jobb med å stabilisera drifta slik at vi oppnådde ny produksjonsrekord i 2018 med 94.000 tonn, seier fabrikksjef Johan Berg i ei pressemelding.

 

Best i klassen

Marknaden for pressbolt har vore stabil gjennom 2018 og veksten i bruk av aluminium i både bil og byggeindustrien bidreg positivt for Hydro. Verket på Husnes har måtta tilføra kaldmetall gjennom delar av året for å møta etterspurnaden.

– Vi får stadig gode tilbakemeldingar frå kundane, og blei av ein av dei største kundane av pressbolt i Europa annonsert som «industry benchmark» på kvalitet. Dette er sjølvsagt utruleg viktig i ein global konkurranse som vert tøffare for kvart år. Og det er ei viktig fjør i hatten til støyperiorganisasjonen som i lang tid har systematisk styrka presisjonen i alle arbeidsprosessane, seier Berg.

 

Attraktiv arbeidsgjevar

Vidare står det å lesa i pressemeldinga at alt går etter planen med oppgraderinga og gjenopninga av B-hallen, og at det er venta at linja vil starta produksjonen første halvår 2020.

– Det er spennande å ta del i dette prosjektet som er så viktig for Hydro Husnes. Det er mange involverte og ekstra gledeleg er det å sjå at våre lokale leverandørar har vist seg konkurransedyktige i å få oppdrag i prosjektet, seier Berg og legg til:

– Like gledeleg var det å sjå den enorme interessa for å jobba på Hydro Husnes. Vi fekk inn over 500 søknadar på jobbane som vi skal fylla i løpet av 2019 og 2020.