Torsdag morgon overrekte Per Øyvind Sævartveit og Hydro Husnes 100.000 kroner til Veronica Thorsen (t.v.), Carina Johnsen og Oddrunn Steinsland frå aksjonskomiteen i Kvinnherad.

100.000 kroner til TV-aksjonen

Torsdag morgon overrekte Hydro Husnes-direktør Per Øyvind Sævartveit ein sjekk på 100.000 kroner til representantar frå aksjonskomiteen i Kvinnherad.

– Vi er veldig glade for at vi kan bidra til ein pangstart for den lokale innsamlingsaksjonen. Og så håpar eg at dette er ei kjelde til inspirasjon og givarglede til folk og andre bedrifter i Kvinnherad, sa Sævartveit før han på vegne av Hydro Husnes kunne overrekkja ein sjekk av det omfanget til TV-aksjonen for andre året på rad.

Han brukte samstundes anledninga til å skryta over det arbeidet Røde Kors gjer.

Artikkelen held fram under annonsen.

– Røde Kors er noko alle kjenner og har eit forhold til. Årets aksjon har difor ein stor appell, både til oss her på Hydro Husnes og folk elles i lokalsamfunnet. Det at vanlege folk engasjerer seg og stiller opp når det trengs er ein utruleg verdi som vi ofte tar for gitt. Men desse pengane går til folk som ikkje har det slik, sa Sævartveit.

Og gåva vart veldig godt motteke av Veronica Thorsen, Carina Johnsen og Oddrunn Steinsland frå aksjonskomiteen.

– Det å byrja med 100.000 kroner torsdag morgon er ein strålande start, og noko vi er veldig takknemlege for, sa leiar i Frivilligsentralen Veronica Thorsen.

Seinare i dag får også andre lokale bedrifter sjansen til å bidra, då ordførar Peder Sjo Slettebø skal gjennomføra ein ringerunde i regi av TV-aksjonen.