Verdspremiere på Varaldsøy-filmen
Fredag blir det første visning av Varaldsøy-filmen, i bygdehuset på øya og med påfølgande premierefest etterpå.
Filmskaparane Olaug Spissøy Kyvik og Aslaug Holm fekk vist ein 43 minutt lang versjon av dokumentarfilmen på TV2 i vår, under tittelen «Eldreopprørarane». På fredag skal dei for aller første gong visa ein ti minutt lenger versjon av filmen, som no heiter «Husokkupantane».
– 43 minutt er det som formatet til Dokument 2 tillét. Desse ti ekstra minutta har me brukt til å få inn meir poesi og meir luft i filmen. Det blir meir fokus på hovudpersonane enn det vart i programmet som TV2 viste. Der var dei meir saka som stod fremst. No føler me at filmen står meir på eigne bein, seier Olaug Spissøy Kyvik til Grenda.
Artikkelen held fram under annonsen.
Etter verdspremieren blir det kanapear, bobler og sosialt samkome.
– Det blir spennande å få vita kva folk synest som filmen, meiner Kyvik, som har inntrykk av at det også kjem til å koma folk frå andre stader enn Varaldsøy for å vera med på premieren.