Ti bedrifter inngår samarbeid

Ti bedrifter i Kvinnherad, Odda og Jondal har skipa samarbeidsorganet Fonna Contracting. Målet er å auka sjansane for å sikra seg oppdrag for oljeindustrien.

Klyngesamarbeidet kom i stand etter initiativ frå bedriftene sjølve, og vert koordinert av Kvinnherad Næringsservice og Odda Næringshage. Førebels er ti verksemder med, men det er ope for fleire å melda seg inn. Seks av bedriftene er frå Kvinnherad, tre frå odda og éi frå Jondal. Dei som er med er: Zenit Engineering, Eide Marine Services, Halsnøy Dokk, Reins Maskinering, HMR, Maritim Service, NLI Odda, Odda Mekaniske Verksted, Odda Coating Technology og Jondal Stål.

På torsdag fekk Kvinnherad Næringsservice midlar til koordinatorarbeidet.

– Dei fleste bedriftene har permitteringar, og vil i 2016 måtte permittera fleire. Ut frå dagens marknad og dei utfordringane ein står ovanfor, er det viktig å mobilisera og jobba for å vera attraktiv som leverandør når marknaden igjen tar seg opp. Ved å setja i gang dette prosjektet, der dei kan samarbeida om å levera ein felles pakke, kan dei vera med og konkurrera med større aktørar, heiter det i søknaden.

Subsea

Bedriftene sin idé er å laga ein overbyggjande organisasjon som skal jobba for å skaffa store oppdrag for dei involverte. Mellom anna ser ein moglegheiter innan subsea-modular. Fonna Contracting ynskjer også koma med i klyngeprogrammet Arena, der Innovasjon Norge er involvert.

Rådmannen innstilte på å løyva 30.000 kroner, som er maksgrensa i næringsfondet sine vedtekter. Men politikarane følte prosjektet er så godt at dei i staden løyve det dobbelte, og dermed like mykje som Kvinnherad Næringsservice søkte om.

– Mange bedrifter er med og prosjektet kan få store ringverknader, argumenterte Leif Sverre Enes (H).

Vedtaket om å gje 60.000 kroner var samrøystes.