Tek eitt års pause
Styret i Kvinnherad kulturfestival føler dei er har for lite tid på seg til å laga ein god festival i 2017, og har difor bestemt å ta eitt års pause.
I februar vart Kvinnherad kulturfestival på Husnes arrangert for 13. gong. Seinare har primus motor og kultursjef Kristian Bringedal blitt pensjonist, og den nye leiinga treng tid på seg til å setja eigne idear i verk.
– Tida er inne for å tenkja nytt, og vi ynskjer å gjera ein del om på konseptet. Men faktum er at vi ikkje rekk det no, seier Ágúst Magnússon, styremedlem i festivalen og dagleg leiar i Kvinnherad kultursenter, til Grenda.
Artikkelen held fram under annonsen.
Nå ut til fleire
Heilt kva endringar det vert, er førebels ikkje avklart. Men nokre tankar har styret om det.
– Vi ynskjer mellom anna å involvera fleire personar i arbeidet, samt å leggja om både på marknadsføringa og kommunikasjonen. Det må dessutan vera eit mål å nå ut til fleire publikummarar. Men fyrst må vi skaffa oss full oversikt, ikkje minst over økonomien, opplyser Magnússon.
At han sjølv er ganske fersk i stillinga si og at kommunen enno ikkje har tilsett ny kultursjef etter Bringedal, har påverka avgjerda om å avlysa neste års festival.
– Eg føler vi ikkje er heilt klare. Det vert altfor lite tid til at vi klarar å presentera eit program som er godt nok, meiner Ágúst Magnússon.
Open dag
Artikkelen held fram under annonsen.
Som eit lite plaster på såret for avlysinga, er det planen å arrangera ein open dag i februar 2017, med ymse aktivitetar både på biblioteket og i kulturskulen.
Leiinga takkar elles hovudsponsorane som har støtta festivalen, og vonar å få koma attende til dei når arrangementet oppstår i ny drakt.