Studerer i unntakstilstand

Fritjof Lyse Falk studerer i Reims, 40 minutt med tog frå Paris. Han merkar at terroren førre fredag framleis held ei tyngjande hand over landet.

– Me merkar at det er annleis. Det er unntakstilstand framleis, og tryggleiksoppbodet på skulen er no likt på det ein opplever på flyplassar. Men det er akkurat like mykje skulearbeid som før, seier Fritjof Lyse Falk.

22-åringen studerer til ein bachelorgrad ved Sciences Po, med politikk, juss og økonomi på timeplanen. Han var ikkje i Paris då terroren råka.

– Me reiser ofte inn til Paris. Eg og nokre til var i området der det small fredagen før. Og så var hovudmannen Charlie Hebdo-terroren i januar her frå Reims, så me har merka litt til det i år, fortel Falk.

 

Uroa

Ungdommen med foreldre frå Omvikdalen og Uskedalen har opplevd eit Frankrike i sorg den siste veka. Ein unngår samlingar, idrettsarrangement er avlyste og aktiviteten er lågare.

– Frankrike har eigentleg reagert motsett av slik landet gjorde etter terroren i januar. Då samla ein seg ute, og viste at saman er ein sterke. No vart ein råka av eit angrep mot alle, på dei unge og dei som hadde det kjekt, ikkje ulikt det me i Norge opplevde 22. juli 2011, seier Fritjof.

At mange var uroa for han, fekk han merka i timane etter terroren.

– Eg fekk ei melding frå mamma der ho skreiv «Du er ikkje i Paris, sant?». Men eg fekk spørsmål frå mange andre òg, gjerne folk eg ikkje har hatt kontakt med på ei stund, som lurte på korleis det gjekk, seier han.

Han har siste eksamen 18. desember. Då blir det tur heim til Omvikdalen, og kanskje nokre skift på Hydro Husnes. Før den tid ventar ein månad med studering.

– Det er mykje å hengja fingrane i på skulen, men eg får tid til å spela litt fotball også. Rugby måtte eg kutta ut på grunn av ein skade. I tillegg har eg engasjert meg i ANSA, organisasjonen for norske studentar i utlandet, fortel han.

Framleis rår det unntakstilstand, og landet har innført grensekontroll.

– Eg føler meg trygg. Men det ligg i bakhovudet heile tida, sluttar han.