Frida Berge viste god form i Seattle førre helg. (Arkivfoto).

Sterkt løp i Seattle

Frida Berge frå Ølve leverte særs sterk innsats på 3.000 meter hinder førre helg. Tida er ny bestenotering for universitetet ho studerer på.

Laurdag og søndag vart stemnet Pac-12 Championships arrangert i Seattle. Blant øvingane var 3.000 meter hinder. Der kom Frida Berge i mål som nummer to, på den svært sterke tida 9.56,79. Det var åtte sekund bak vinnaren, men også åtte sekund føre nummer tre. Tida var samstundes ei forbetring av hennar eigen kretsrekord for Hordaland – også her var åtte sekund det magiske talet.

– Det var berre snaue to sekund bak EM-kravet, og ho forbetra sin sjuandeplass i Norge gjennom alle tider. Tida er også skulerekord, noko som må seiast å vera imponerande med tanke på at ho går på legendariske University of Oregon, skriv nettstaden friidrett.no.