Skal diskutera HV med Stortinget

Facebook-gruppa «Styrk Heimevernet» har meir enn 12.500 medlemmer og to kvinnheringar blant moderatorane. Om halvanna veke skal dei til Oslo for å diskutera Forsvaret si framtid med Stortinget.

I midten av juni la regjeringa fram sin nye langtidsplan for forsvarssektoren.

– Vi skal fornya og forsterka vår forsvarsevne, sa statsminister Erna Solberg og kalla det ei historisk satsing på Forsvaret.

Men ikkje alle er samde i denne vurderinga. I går offentleggjorde Facebook-gruppa «Styrk Heimevernet» eit 80 sider langt innspel til planen.

– Vi er sterkt usamde i stort sett heile planen, men har vårt fokus på Heimevernet, seier Geir Dolonen-Marthinussen frå Husnes, ein av åtte moderatorar for gruppa. Også Alf Helge Hermansen frå Sandvoll har ei slik rolle.

Det er mange som deler deira syn på stoda. Gruppa har no over 12.500 medlemmer.

– Målet er å veksa til 15.000 før planen skal handsamast av Stortinget, noko som er identisk med talet mannskap regjeringa ynskjer å fjerna frå Heimevernet, fortel Dolonen-Marthinussen.

«Styrk Heimevernet» sin rapport har fått tittelen «Et landsdekkende og kampklart HV for fremtiden». På framsida vert tungtvasshelt Joachim Rønneberg sitert med «Fridom kjem ikkje gratis» og Kong Harald med «Verdsbiletet kan fort snu. Vi kan ikkje ta freden for gitt».

Onsdag 24. august vert det arrangert ei stortingshøyring om framtida til det norske forsvaret. Geir Dolonen-Marthinussen og fleire frå «Styrk Heimevernet» skal vera med.

– Dette er litt historisk òg, for eg trur aldri ei Facebook-gruppe har vore påmeldt til ei stortingshøyring før, seier han.