Denne kvartetten lovar ei stor musikalsk oppleving på Snikkeriet neste torsdag. (Pressefoto).

Selebert besøk på Snikkeriet

Snikkeriet i Rosendal bed musikkinteresserte halda av torsdag 28. juli. Då kjem nemleg sjølvaste Hot Club de Norvège for å halda konsert.

Hot Club de Norvège, som vart etablert som profesjonelt ensemble i 1979 i Oslo, er ein norsk jazzkvartett, kjent for kontinuerlig turnéverksemd heilt sidan 70-talet, samt ei rekke plateutgjevingar med utgangspunkt i musikken til den franske sigøynargitaristen Django Reinhardt. Bandet består av initiativtakar Jon Larsen (gitar), Per Frydenlund (gitar), Svein Aarbostad (bass og poesi) og Finn Hauge (fiolin, munnspel og sag).

Jon Larsen er tildelt NOPA sin pris Årets Verk i 1994, Buddyprisen (Norsk Jazzforbunds høgaste utmerking) i 2007, Oslo By sin Kunstnarpris i 2008 og Kardemommestipendet i 2009.

Artikkelen held fram under annonsen.

 

Nigel Kennedy

– Gruppa er ei av dei mest turnerande grupper i Norge gjennom tidene, og har turnert over det meste av kloden. Dei har utgitt et stort tal plater og bidrege på ei mengde prosjekt med andre artistar, som til dømes «Tanta til Beate» med Lillebjørn Nilsen og «Løver og tigre» med Øystein Sunde, vert det opplyst i ei pressemelding.

Hot Club de Norvège har samarbeidd med dei fleste artistane innan internasjonal Djangomusikk i dag, frå Stochelo Rosenberg, Bireli Lagrene, Angelo Debarre, Jimmy Rosenberg, Adrien Moignard og Florin Nicolescu, til mainstream-artistar som Jon Gordon og Howard Alden. De har også spelt saman med ei heil rekke klassiske utøvarar, frå Nigel Kennedy og Vertavokvartetten til Camelia Strykevartett og symfoniorkestra i Kristiansand, Tromsø og Trondheim.

Vi kan leggja til at det dagen etter vert konsert med dei lokale heltane i Hot Club de Quindherred.