Samla inn pengar etter tjuveri

Tidleg i januar var det eit større innbrot på ungdomssenteret på Husnes. Ungdomen tek no sjølve tak for å erstatta det som vart stole.

Under innbrotet forsvann alt av pc-utstyr og dataspelutstyr. Truleg snakkar vi om verdiar for kring 100.000 kroner.

– Det er ikkje berre dårleg gjort, men også veldig barnsleg. Men det er ikkje mykje vi kan gjera med det anna enn å tena inn pengar til å kjøpa nytt, seier Daniel Tvedt til Grenda.

Han var ein av ni ungdomar som laurdag hadde stand på storsenteret, på eige initiativ. Der selde dei kaker, kaffi, saft og fint strikketøy. Sistnemnde var donert av Møteplassen Aksen og av foreldre.

– Det er veldig mange som har gitt pengar også utan å kjøpa noko, opplyste Geirmund Rørvik.

– Nokon har til og med gitt dataspel og konsollar, la Daniel Tvedt til.

Dumt

Også Gunn Kristine Rørvik reagerte sterkt på tjuveriet.

– Det er veldig trist, spesielt sidan ein har mistanke om at det er ungdomar som har gjort det. Eg synest det er dumt når ein veit kor mykje ungdomssenteret har gjort for oss. Det er der vi møter andre og er sosiale, sa ho.

Strikketøyet som ikkje vart seld på standen, skal truleg seljast komande laurdag.