Ryddar langs vegen til Åkra

Dei neste vekene blir det rydda i vegetasjonen mellom Baugstranda og Åkra.

Det er Voss-firmaet Hogst & Rydding som utfører arbeidet, som i praksis går ut på å reinska i vegetasjonen nær vegen.

– Me tar det meste av småtre og buskar som er nærare vegen enn 2,5 meter. Me kjem også til å saga ned ein del greiner som heng over vegen. Ein ynskjer å halda vegetasjonen som er over vegen fri, slik at at snøen ikkje skal tyngja det ned, fortel Stanislaw Zglobicki til Grenda medan han vinkar passerande trafikk forbi.

Saman med kollegaen Wojcech Knapik har han sidan onsdag gått laus med motorsag og handsag for å få ned mest mogeleg.

– Det er varmt og tungt, seier polakkane medan dei tørkar sveitte av sine respektive panner.

Og karane treng å hengja i. Dei skal rydda langs kring 12 kilometer veg på om lag like mange dagar.

– Det er mykje å rekkja over, vedgår dei før dei drar i gang motorsaga igjen.