Opptur for 8. klassingane til Vardhaugselet

Onsdag 4. mai skal alle 14‐åringane i Kvinnherad på tur til Vardhaugselet saman med Kvinnherad turlag.

DNT står i år for 114 Opptur‐arrangement, der åttandeklassingar frå heile landet deltar.

I år blir den nasjonale turdagen arrangert for 11. gong, med over 34.000 påmeldte elevar. Heile 481 skular deltek, det er 40 fleire enn i fjor.

– Opptur er ein kjekk dag for ungdomane, ein heil skuledag på tur i lag med elevar frå alle dei fem ungdomsskulane i Kvinnherad. Her får dei høve til å møta andre og bli kjent. Ikkje noko anna arrangement får ut alle kvinnheringane frå eit årskull! For oss som arrangørar er det difor stas å få lov til å be dei med ut på tur til Nordfjell, Vardhaugselet og ned att om Olderbotn. Start og mål er ved kapellet på Valen sjukehus, melder Kjell Yri i Kvinnherad Turlag.

I Hordaland er det 11 lokale oppturarrangement. Det er forventa at rundt 6000 spreke og blide ungdomar skapar liv og røre rundt om i Hordalandsfjella den 4. mai.