Ny butikk i Skålafjæro

Med utsalsstad i Skålafjæro ynskjer den kreative og sprudlande kunstnaren Kari Fjeldstad å visa innbyggjarane i Rosendal alt det gode naturen har å by på.

Elektroingeniøren frå Os har dei siste 15 åra besøkt Rosendal jamleg. No, gjennom enkelmannsføretaket «Vern om min jord», har Fjeldstad gjort besøket meir permanent, og har teke inn i lokalet ved sida av rammeverkstaden Baron i Skålafjæro.

– Eg tek foto av naturlege ting og lagar puter, tapetar, t-skjorter, glas og alt mogleg anna av bileta mine. Eg har lyst til å visa dei små tinga som eg ser, som kanskje ikkje alle andre ser ved første augekast. Alt det vakre som naturen vår har å by på, seier Fjeldstad.

Det kan vera alt frå måker på havet, ei bie i ei nyperose, eller ein halvvissen tulipan. Små detaljar som vert omgjort til større ting ved hjelp av den kreative sida til Kari Fjeldstad. I utgangspunktet hadde ho planar om å opna butikk heime i Os, men då ho på eit av sine mange besøk i Rosendal kom over dette lokalet, var ho aldri i tvil.

– Eg gjekk forbi og såg det tomme lokalet og tenkte at dette måtte vera noko for meg. Eg fekk kontakt med eigaren og kunne ikkje vore meir nøgd enn det eg er i dag.

Les meir i torsdagens Grenda eller kjøp pdf-utgåva.